Coppa Italia champion Juventus

Kum thum hnua a vawi khat nan Juventus chuan champion nomawi an chawi ve leh ta a, Nilaini zan khan Coppa Italia final-ah Atalanta chu 1-0 a hnehin, Italian Cup-ah an champion.

Stadio Olimpico-a final inkhel hmuhnawmah Dusan Vlahovic chuan minute lina lekah goal a khung nghal a, Atalanta-in a chhanletna tur an neih loh avangin Juventus-in nomawi an hawn.

Juve tan Italian Cup-a vawi 15 an champion-na chiah a ni a, champion ngun ber record an chelh mek chu an pawt sei. Hei mai a ni lo, final khel hnem ber an ni bawk a, Coppa Italia final hi vawi 22 an khel tawh!

A ṭhing her lum

Juventus-in champion nomawi an chawi hnuhnun ber chu 2020-21 season kha a ni a, Coppa Italia-ah tho an champion - hemi ṭum final-a an tum pawh hi tun season final-a an hmachhawn Atalanta tho an ni a, 2-1 in an hneh hram.

Atalanta-in thawnthu her danglam a, Juventus lakah phuba lak tum mah se, minute lina lekah goal an chhuah nghal a, Vlahovic chuan Andrea Cam-biaso siamsak chu box chhungah la lutin, goal-ah a chantir.

Vlahovic hian 2022 final-a Inter Milan an ngam loh ṭumin Juve tan goal a lo khung tawh a, Savino Bellini (1937-38, 1941-42) leh John Charles (1958-59, 1959-60) hnua Juve player, Coppa Italia final vawi hniha goal khung thei hmasa ber a ni.

A thar zawkin

Juve-in kum thum hnuah nomawi an chawi ve leh ta a, Vlahovic chuan season tharah nomawi langsar zawk chawi tura an lo kir tur thu a sawi. Serbian striker chuan, "Sawi mai tur pawh ka vai a, lawmthu sawi mai loh chu tihtheih ka nei rih lo.

"Kan hmaa harsatna inchhawpte ka hrethiam a, mahse, chuti chunga season ṭantira kan tumna kan tihlawhtling thei hi ka lawm hle. Scudetto kan chawi ta lo a, pawi ka ti. Mahse, an phu ang ngeiin Inter Milan an champion.

"Kan hlim em em a, mahse, season tharah chuan nomawi zawng zawng chawi kan tum tur a ni a, Juventus thisenin hei hi chu a phut tlat a ni," a ti a, season thar a thlir der.

Kha le Allegri

Massimiliano Allegri-a'n Juventus a enkawl hmasakin Serie A-ah season nga chhung a zawnin a lo champion pui tawh a, Coppa Italia nomawi pali ngawt a chawi tawh bawk - July 2021-ah Juve-ah kir mah se, nomawi a chawi leh lawk lo.

Mahse, tun season-ah a champion ve leh ta a, Coppa Italia-a vawi nga champion thei coach hmasa ber a ni. Vawi li champion tawh Sven-Goran Eriksson leh Roberto Mancini khumin record thar a siam.

Allegri chuan, "Ka naute ka lawmpui takzet a, he club, fans leh ka tan hlimna an thlen a ni. Nomawi chawi hi thil awlsam a ni lo a, mahse, kan thisenah a bet tlat a ni," a ti.

Khawiah maw?

Allegri-a'n record ropui tak siamin Juve a champion pui a, mahse, Italian coach hi chhuak tur anga sawi thawm a ri ring hle. Allegri chuan, "Season tharah Juve coach ka ni ta lo a nih pawhin team ṭha tak ka hnutchhiah dawn," a ti a, club pawhin ngaihtuahna an sen tur thu a sawi.

Kum 56 mi Allegri hi khelmual pawn lama a chet dan avangin red card pek a ni a, a tawpah erawh a naute a champion pui ta tho - inkhelh zawhah journalist pakhat chuan Juve a kalsan dan tura a lawm leh lawm loh a zawt.

Mahse, Allegri hian, "Min ban ta der mai elaw?" tiin, nui chungin a zawt let a, amah hi chuan Turin khaw club-a cham chhunzawm zel a la châk rih niin a lang.