Cavs hnehin Boston Celtics an tlang

Boston Celtics chuan team ṭha leh chungnung zawk an nihna an lantir, nimin zing khan Cleveland Cavaliers chu 113-98 a hnehin Eastern Conference finals an lut a, tun hnaiah a zawnin season thum chhung conference semifinal an paltlang.

TD Garden-a inkhelah Boston Celtics tan an thiampuipa Jayson Tatum chuan point 25 a nei a, seeded pakhatnain best of seven series 4-1 a an lak theih nan a thawhhlawk thei hle a ni.

Boston Celtics hian Indiana Pacers leh New York Knicks inkhela chak zawk nen Eastern Conference title an inchuh dawn. Knicks hian series-ah 3-2 in hma an hruai mek - Inrinni zing dar 6:00 hian game 6 an khelh chhunzawm ang.

Eastern Conference champion nih mai hi a tawk lo, conference pahnih champion ten NBA champion nih an inchuh leh ṭhin, basketball inelna lian leh ngaihhluta champion nih hi thil harsa tak a ni.

Nimin zing Western Conference semifinal-ah Dallas Mavericks chuan Oklahoma City Thunder 104-92 in an hneh - Dallas Mavericks hian best of seven series-ah 3-2 in hma an hruai leh ta chiah.

Dallas Mavericks an chak theih nan Luka Doncic chuan point 31 a nei a, a zawna triple-double a neihna ni turin rebound vawi 10 a lak bakah ṭum 11 a assist bawk a, an chakna hnar pawimawh a ni.

Slovenian guard Doncic chuan, "Match hmasa lama kan chak lohna kha kan en let a nih chuan keimahni tihsual vang a ni zel, chuvangin kan elpui team ni loin keimahni hi kan pawimawh ber zawk.

"Infiamna dang ang bawkin basketball-ah chuan rilru puthmang a pawimawh, tun ṭumah pawh khan kan rilru a dik em avangin a tir aṭangin kan dingnghet hle," a ti a, game khelh hmabak an neih atan pawh inrintawkna a nei sang hle.