Old Trafford-ah FA Cup kan hawn ang - Ten Hag

Manchester United-in Nilaini zan khan Old Trafford-ah Newcastle United 3-2 in an hneh. Inkhelh banah Erik Ten Hag chuan Old Trafford-ah FA Cup nomawi hawn a tiam.

Man United hian May 19, Pathianni hian Brighton & Hove Albion an tlawh ang a, hemi zawh hian Manchester City nen May 25, Inrinni zanah FA Cup final an khel dawn.

An la tlusawp lo

Man United-in khualmualah Crystal Palace 4-0 ngawtin an hneh lo a, an mualah Arsenal 1-0 in an hneh lo leh bawk. Tun season-ah Ten Hag-a hote hi vawi 14 zet an chak lo tawh a, Premier League aṭang chuan Europa League an khel pha tawh lo.

Mahse, Man United hi an la tlusawp bik lo. An chung chiaha awm Magpies an hmachhawn a, bul ṭantu zingah striker an awm loh bakah centre back atana Casemiro hmang chungin hnehna a chang.

Minute 31-naah Kobbie Mainoo-a'n box chhungah ball ṭha chang fuhin awlsam hmel takin goal kilah a pet lut. Newcastle United-in an nawr na a, tun hnaia che ṭha lo Casemiro chu tlarhnungah a che ṭha takzet. Anthony Gordon goal khung tur a dan bakah goalline aṭangin a tauh chhuak bawk.

Mahse, minute 49-naah Gordon-a'n siphurh sutna goal a khung ta tho. Goal chhuah hnuah Man United an buai phah lo a, corner kick aṭanga ball kal chu Amad Diallo-a'n kawh zetin a pet goal.

Bench aṭanga lut Rasmus Hojlund-a'n box pawnah changin a hmaah defender pahnih awm mah se goal lam a pan a, box chhung a thleng chiah tihin goal kilah a pet lut. Injury time-ah Lewis Hall-a'n box pawn aṭangin mawi zetin pet goal mah se result a thlak da nglam pha lo, Man United 3-2 in an chak.

An infuih phur e

Inkhelh banah Man United manager Ten Hag leh player-ten mipui an hmachhawn a, microphone aṭangin Dutch manager hian mipui a cho phur. Ten Hag chuan, "Player leh keimah aiawhin lawmthu ka hrilh duh che u. Season harsa tak kan hmachhawn a, thil pakhat erawh a ngai reng. Engtik lai pawhin team chakna turin theihtawpin min au phur ṭhin.

"Lawmna tur erawh a awm. Tun season a la tawp lo. Point thum hmu turin Brighton kan tlawh phawt ang a, chumi zawhah Wembley kan pan ang. Ka tiam duh che u chu, Ka player-te hian nomawi kan chawi theihna turin an theihna zawng zawng an hlan dawn.

"Nangni pawhin Wembley Stadium-ah hian min ṭawiawm ṭha dawn tih kan hria. In chungah kan lawm a, khawvela supporter ṭha ber in ni," tiin a sawi a, Old Trafford-a mipui thawm chu ṭha tak a ni.

FA Cup-a Man United an champion chuan season tharah Europa League an khel dawn. An champion lo thung erawh chuan Premier League-a paruknain Europa League an khel ang a, pasarihnain Europa Conference League an khel ang.