Semifinal-ah Zverev a lut

Italian Open khelh laiah Alexander Zverev chuan harsatna lian tak a tawk rih lo - Nilaini zan quarterfinal inkhelah Taylor Fritz chu 6-4, 6-3 a hnehin semifinal a inhlangkai.

Seeded pathumna Zverev hian a khingpui lakah buaina nei lo mah se, a pum nuam lo leh banrek vangin harsatna nasa vak lo chu a tawk a, buaina tenau nei mah se a thiam pali zinga tel turin a la tlang tho.

German tlangval Zverev chuan, "Taylor hi tun season chu a khel ṭha, a bik takin clay court-ah phei chuan a hlauhawm berte zinga mi a ni, chutiang mi hneh chunga quarterfinal paltlang theih chu a hlu.

"Ka hriselna dinhmun endik a ngai dawn, buaina lian a nih loh ka beisei," a ti. Zverev hian a match lehpekah chuan seeded 29-na Alejandro Tabilo a hmachhawn leh dawn - Chilean player hian Zhang Zhizhen chu 6-3, 6-4 in a lo hneh ve thung.

Clay court inelna Italian Open-ah hian Rafael Nadal leh Novak Djokovic te pawh an tel a, player ropui pahnih hian beisei phak loin an zinkawng a tawp tawh - French Open atan duhthusama ṭhain inbuatsaihna an nei thei lo.

Hmeichhe inelna lamah Aryna Sabalenka chuan Jelena Ostapenko chu 6-2, 6-4 a hnehin semifinal a lut a, seeded pahnihna Sabalenka hian hnehna chang turin darkar khat leh minute 13 chauh hun a mamawh.

Sabalenka hian a match lehpekah chuan Danielle Collins a hmachhawn ang. Collians hian Australian Open vawi hnih champion tawh Victoria Azarenka chu 6-4, 6-3 in a hneh ve thung a ni.

May 20, Thawhṭanni aṭangin clay court inelna lian ber French Open chu Paris khawpuiah khelh a ni dawn, tun ṭuma khelh lai Italian Open pawh hi Roland Garros atana inbuatsaihna hnuhnung a ni nghal bawk.