Champions League khel tur Atletico Madrid

Atletico Madrid forward Antoine Griezmann chuan Nilaini zan khan hattrick a siam a, Atletico chu season thara Champions League khel turin a hruai kai - Getafe chu khualmualah 3-0 in an hneh.

Diego Simeone-a naute hian beisei anga season an hman loh avangin Champions League pawh an khelh phak loh mai rinna a lian hman hle. Mahse, Nilaini zanah anmahni hnaihtu ber Athletic Bilbao chu Celta Vigo lakah 2-1 in an tlawm a, Atletico an chak avangin an dinhmun a chiang zui.

La Liga-ah match hnih leh match thum khelh tur la nei club awm hlawm mah se, engkim a chiang titih tawh. Real Madrid an champion chiang tawh a, anni bakah hian Barcelona, Girona leh Atletico-in Champions League an khel dawn.

Hetihlai hian Segunda division lama tla thla tur hi pakhat a la chiang thei lo. Almeria leh Granada chu tla chiang tawh an ni a, relegation zone-a awm Cadiz-in 17-na Real Mallorca an la um phak theih avangin hei chauh hi chiang lo a awm tawh.

A hming Griezmann

Barcelona-a beisei phak lo Antoine Griezmann-a'n a hmangaih hmasa Atletico Madrid-ah lawm a hlawh zel a, hattrick a siam leh ta - minute 27-naah Griezmann hian a goal hmasa ber a khung a, Rodrigo De Paul siamsak a ni.

Minute 42-naah Griezmann hian a belhchhah leh a, goalkeeper David Soria tan tih theih a awm lo. Goal dang lut loin chawlhlawk hman a ni a, second half-ah French forward bawk a inlar.

Griezmann hian Samuel Lino-a siamsak chu goal-ah a chantir a, hattrick a siam - kum 33 mi forward hian tun season inelna hrang hrangah match 46 khelin goal 24 a khung tling ta a, assist vawi riat a nei bawk. La Liga bikah goal 16 a khung tawh.

France tan vawi 127 inlana goal 44 khungtu Griezmann hian Barcelona-a season hnih a khelh hnuah Atletico-ah hian season thum a hmang leh tawh a, a kir lehna season-ah goal riat chiah khung mah se, season hmasaah goal 16 khungin a insiamrem ṭan a, tun season-ah phei chuan goal 24 lai a khung tling ta.

A sang pali

Real Madrid leh Barcelona vawk lal lenna ṭhiat a, an inkara hming lo lang ve ṭhin Atletico-in tun season-ah beisei an phak lo a, heti chung hian Champions League an khel dawn ta tho - Bilbao chak loh zarah an hma hun tur a chiang hma.

Copa del Rey nomawi an chawi hnuah Bilbao hi an che fuh hleithei lo. April 6 khan Spanish Cup-ah hian Real Mallorca hnehin champion nomawi an chawi a, hemi hnuah hian league match ruk khelin vawi khat chiah an chak - vawi thum draw in, vawi hnih an tlawm.

Nilaini zanah pawh Bilbao-in thawnthu an her danglam thei lo a, Celta Vigo lakah 2-1 in an tlawm. Bilbao tan Álex Berenguer chuan minute 23-na lekah goal hmahruai a khung a, mahse, tlak hlau Celta-in tlawm an duh lo.

Second half-ah Williot Swedberg leh Hugo Álvarez hmangin Bilbao an chhanglet a, 2-1 in an chak daih - Celta tlukin Atletico an lo lawm ve bawk.