Murray-a wildcard an pe

Andy Murray chu French Open buatsaihtu lamin duhsak takin wildcard an pe a, clay court inelna lianah hian qualifying khelh hah hran ngai loin main draw aṭangin a khel nghal thei dawn tihna a ni.

Britain tlangval Murray hi hliam vangin a buai rei hle a, a ranking pawh a hniam phah. Tun dinhmunah world number 110-na daih a ni avangin a dinhmun a ṭha lo, mahse tun hma lama a sulhnu leh thil lo tih tawhte avangin duhsak hi a phu.

US Open-ah pawh khan world number 1 hlui hi wildcard an lo pe tawh. Wildcard pek tur hian dan mumal tak siam a ni lem lo, tournament buatsaihtu lamin an dinhmun thlir chungin duhsak phu leh awm an tih zawng hnenah an pe mai ṭhin.

Paris khawpuiah September 27 aṭangin Roland Garros khelh a ni dawn, mipa singles atan chuan Murray bak hi hnam dang player zingah wildcard pek an awm lo, midang chu French player vek an ni. Hmeichhe lamah ram pawn mi Eugenie Bouchard leh Tsvetana Pironkova te an pe bawk.

Kum 33 mi Murray hian 2014-2017 chhung khan a zawnin season li chhung chu French Open-ah hian semifinal a lut, player ropui Rafael Nadal leh Roger Federer te an awm miau avangin atan nomawi chawina kawng hawnsak a ni lo.

Tun kar chhung hian French Open inbuatsaih nan Italian Open khelh a ni dawn a, tournament-ah hian Murray hi a inlan rih lo ang. 



Share this Post

Login to comment
No Comments