Africa Cup of Nations final khel tur a hriat ta - Egypt chuan semifinal-ah penalty hmangin a thlengtu Cameroon an pet chhuak a, Pathianni zan dar 12:30-ah Senegal nen final an khel dawn.

Cameroon leh Egypt hi hun pangngaiah 0-0 in an inhnehtawk a, extra time khelh a nih hnuah pawh goal khung thei zawk an awm loh avangin penalty hmanga chinfel a ni.

Egypt goalkeeper Gabaski chu an ram tan 'hero' a ni a, Egypt second choice keeper hian penalty vawi hnih zet dangin a team chu 3-1 in hnehna a chanpui a, mualneitu Cameroon mipui a vel.

Cameroon tan chuan pathumna nih chu beisei tur sang ber a ni ta a, zanin dar 12:30 hian Burkina Fason nen pathumna nih inchuhin an inkhel ang.

Indona chu
Cameroon FA president Samuel Eto'o-a'n Egypt nen an inkhelh hmain an semifinal khelh tur chu, "Indona a ni," tiin a sawi a, Egypt boss Carlos Queiroz-a'n mipui innek buai avanga mi pariat ngawtin nunna an chân avangin Eto'o thusawi chu thil ṭul loah a ngai thung.

Team pahnih intawn hma hauhin boruak a lian a, inkhel en châkawmna a belhchhah. AFCON-a vawi nga champion tawh Cameroon hian kum 2017-a an nomawi pangana an chawi dawn khan final-ah Egypt 'kher' an hneh bawk.

AFCON-a champion ngun ber (7) Egypt tan Cameroon leilung ngeia phuba lakna remchang hi bawhpelh loh chu duhthusam a ni a, Mohamed Salah leh a ṭhiante tan tun aia hun ṭha a awm lo.

Ṭum dang ang bawkin Salah chungah mipui mit a fu a, mahse, Liverpool chhuanvawr hian goal a khung thei bik lo - minute riatna leka a chance neih a chhawr lo a, second half-ah Cameroon back pass sual zarzoin khungna remchang nei mah se goalkeeper Andre Onana chuan a tibuai hman bawk.

Cameroon an vanduai?
Salah a reh a, Cameroon chu tlarhma lama hlauhawm zawk an ni. Michael Ngadeu-Ngadjui chuan uiawm takin post a tauh per a, a per let lehlam chu uiawm tak thoin a hlah.

Samuel Gouet-a'n long range shot hmangin hming chherna remchang nei mah se, Belgian club Mechelen midfielder a vannei bik lo - tun inelnaa goal nga khung tawh Karl Toko Ekambi-a'n goalkeeper Gabaski zawnah tak a tauh bawk.

Middlesbrough midfielder Lea Siliki-a'n freekick hmangin goal chungah chiah chiah a pet a, mipui thawm ṭha viau mah se Cameroon-in fans puihna nen meuh pawh goal net an zawng hmu zo lo.

Minute 120 chhungin Cameroon chu goal khungna hun ngah zawk an ni a, mahse, an chhawr lo. Team pahnihin goal an khung theih loh avangin penalty hmangin final lut tur zawk chinfel a ni zui.

A hming Gabaski
Egypt hian last 16-ah penalty hmangin team ṭha Ivory Coast an pet chhuak tawh a, he inkhelah hian first choice keeper Mohamed El Shenawy a inhliam a, minute 88-naah second choice Gabaski-a'n a thlak.

Gabaski hian Manchester United defender Eric Bailly penalty chu dansakin Egypt hi hnehna a chanpui a, mahse, quarterfinal-a Morocco an hneh ṭum hian ropui taka Nayef Aguerd ball tauh a danna lamah a inhliam ve leh a, third choice keeper Mohamed Sobhy chu ram tana a match hmasa ber khel tura a luh a ngaih phah.

Egyptian club Zamalek tana khel Gabaski hi Cameroon lakah a inlan theih rinawm lo mah se rin loh takin a inlan a, a team a chhanhim leh ta. Gabaski hian Harold Moukoudi leh James Lea Siliki pet chu a dansak a, Clinton N'Jie chuan a pet out bawk.

Cameroon tana pet zingah captain Vincent Aboubakar chiahin a pet goal a, Egypt tan captain Salah a pen chhuak hman lo a, 3-1 in an chak.

Salah vs Mane
Liverpool tana Salah leh Mane inkawp hlauhawmzia hrilh nawn kan ngai lo a, Premier League defender tam tak mut ti tui lo khawpin an hmuhnawm - Pathianni zanah erawh inṭhianṭhatna dah ṭhain an intawng dawn a, hei hi khawvelin a hmuh châk chu a ni.

Salah-a'n tun inelnaah goal hnih chiah a la khung a, assist vawi khat chiah a nei bawk. Mahse, he forward hi group stage-a Nigeria an hneh loh hnu lawka Guinea-Bissau an hnehna inkhela goal awmchhun khungtu a ni a, quarterfinal-a Morocco an hnehna inkhelah goal hmahruai khungin an goal hnihna a assist bawk.

Statistic thlir mawl tawp chuan Salah hian a thawh hlawk lo angin a lang a, mahse, inkhel entu chuan team tana a ṭangkai dan chu an hrethiam ang. Hetihlai hian player langsar tak tak kara Senegal innghahna ber chu Mane a ni ve tho.

Mane hian goal thum khungin assist pawh vawi hnih a nei tawh a, semifinal-ah 3-1 a Burkina Faso an hneh ṭumin goal a khung bakah assist a nei a, last 16-a 2-0 a Cape Verde hnehin goal hmahruai a khung a, group stage-a an chak awmchhuna goal khungtu a ni bawk.

Khaikhinna
Egypt-in Salah tih loh player langsar sawi vul chuk tur an nei lo a, Galatasaray forward Mostafa Mohamed, VfB Stuttgart forward Omar Marmoush, Aston Villa midfielder Trézéguet leh Arsenal midfielder Mohamed Elneny te hi player langsar zual deuh an ni.

Mahse, an player tam zawk Egyptian club-a khel an nih avangin an inhrechiang a, thawhhona ṭha chu an chhuan ber a ni - Ivory Coast, Morocco leh Cameroon pet chhuak thei team an ni tih hriat a ṭha.

Hetihlai hian Senegal erawhin Chelsea keeper ṭha Édouard Mendy, Napoli captain Kalidou Koulibaly, Paris Saint-Germain midfielder Idrissa Gueye, Villarreal forward Boulaye Dia leh Watford forward Ismaïla Sarr te ho an kawl.

Mahse, he team hian an final kalkawngah team ṭha tia sawi vul chuk tur hmachhawn an nei lem lo a, Egypt lakah fimkhur a finthlak ang - Egypt hi an coach Queiroz chu semifinal-ah red card pek a ni a, assistant Wael Gomaa pawh hrem a nih avangin final-ah team an ho thei dawn lo.

Final Kalkawng
Group Stage
January 10, Thawhṭanni Zan
Senegal 1 - 0 Zimbabwe
SEN: Sadio Mane 90+7'
January 14, Zirtawpni Zan
Senegal 0 - 0 Guinea
January 18, Thawhlehni Zan
Malawi 0 - 0 Senegal
January 11, Thawhlehni Zan
Nigeria 1 - 0 Egypt
NIG: Kelechi Iheanacho 30'
January 15, Inrinni Zan
Guinea-Bissau 0 - 1 Egypt
EGY: Mohamed Salah 69'
January 19, Nilaini Zan
Egypt 1 - 0 Sudan
EGY: Mohamed Abdelmonem 35'

Round of 16
January 25, Thawhlehni Zan
Senegal 2 - 0 Cape Verde
SEN: Sadio Mane 63'; Bamba Dieng 90+2'
January 26, Nilaini Zan
Ivory Coast 0 - 0 Egypt
*Penalty-ah 5-4 in Egypt an chak

Quarterfinal
January 30, Pathianni Zan
Egypt 2 - 1 Morocco
EGY: Mohamed Salah 53'; Trézéguet 100'
MOR: Sofiane Boufal 6' (P)
Senegal 3 - 1 Equatorial Guinea
SEN: Famara Diedhiou 28'; Cheikhou Kouyate 68'; Ismaila Sarr 79'
EQU: Jannick Buyla 57'
Semifinal
February 2, Nilaini Zan
Burkina Faso 1 - 3 Senegal
BUR: Blati Toure 82'
SEN: Abdou Diallo 70'; Idrissa Gueye 76'; Sadio Mane 87'
February 3, Ningani Zan
Cameroon 0 - 0 Egypt
*Penalty-ah 3-1 in Egypt an chak

Penalty pet dan
Cameroon
Vincent Aboubakar G
Harold Moukoudi X
James Léa Siliki X
Clinton N'Jie X

Egypt
Zizo G
Mohamed Abdelmonem G
Mohanad Lasheen G

Zanin Inkhel Tur (Third Place Playoff)
Burkina Faso 12:30 AM Cameroon
February 6, Pathianni Zan (Final)
Senegal 12:30 AM Egypt