Bilbao-in Real an pet chhuak

Copa del Rey round of 16 aṭanga Barcelona an petchhuah hnuin Athletic Bilbao chuan quarterfinal-ah 1-0 in Real Madrid an hneh leh ta a, Spanish Cup semifinal an lut der - La Liga-a point lia hmahruai mektu Real tan domestic double beiseina a tawp zui bawk.

Bilbao hian last 16-ah khan 3-2 in Barcelona an lo hneh tawh a, quarterfinal-ah Real-in an lo hmuah bawk avangin an kawng a awlsam lo hle. Mahse, Real lakah pawh he team hi an zam duh lo a, Alex Berenguer chuan minute 89-naah inkhela goal awmchhun a khung.

Beisei phak lo Real tan si phurh sut turin hun a tlem tawh a, team ṭha lo zawka ngaih lakah 1-0 in an tlawm - Real tan Casemiro leh Isco ten chance nei mah se an chhawr lo a, tlarhmaah Karim Benzema awm loh a lang.

Spanish winger Iker Muniain vanneih zan ni se Bilbao hi goal khat aia tama chak thei an ni a, Real hi an vannei tia sawi pawh a awm lo hran lo - Bilbao hi Real Zaragoza tih loha season khata Cup inelna aṭanga Barcelona leh Real Madrid petchhuak leh thei hmasa ber an ni.

Ningani zana Copa del Rey quarterfinal inkhel dangah Real Betis chuan 4-0 in Real Sociedad an sawp bawk a, Juanmi chuan goal hnih khungin Willian Jose (penalty) leh Aitor Ruibal ten goal khat ve ve an khung bawk.

Copa del Rey - Quarterfinal
February 2, Nilaini Zan
Rayo Vallecano 1 - 0 Mallorca
RAY: Óscar Guido Trejo 44' (P)
Valencia 2 - 1 Cadiz
VAL: Gonçalo Guedes 24'; Hugo Duro 79'
CAD: Lucas Pérez 54' (P)

February 3, Ningani Zan
Real Sociedad 0 - 4 Real Betis
REB: Juanmi 12', 57'; Willian José 83' (P); Aitor Ruibal 87'
Athletic Bilbao 1 - 0 Real Madrid
ATH: Álex Berenguer 89'