Lampard-a bul ṭanna tur Brentford

Frank Lampard-a enkawl Everton-in zanin dar 8:30 hian FA Cup fourth round-ah Brentford an mikhual dawn. Toffees-in Lampard hnuaia an match hmasa ber tur a nih bakah player thar Donny van de Beek leh Delle Alli te an inlan theih avangin en a châkawm. Bees lamin thlasik bazarah Christian Eriksen an lalut a, Danish midfielder erawh a la inlan thei dawn lo.

Lampard zawmtu Cole
Everton manager Lampard-a'n amah pui turin Chelsea leh England tana khelhpui ṭhin Ashley Cole chu first team coach atan a lalut. Lampard leh Cole hi Chelsea tan kum 2006 leh 2014 chhung khan an khel dun a, nomawi ṭhahnem tak an chawi zingah Premier League leh Champions League pawh a tel.

Chelsea an chhuahsan hnuah Derby County-ah an awm dun leh a, Lampard hi manager niin Cole hi player a ni thung. Kum 41 mi Cole hian kum 2019 khan inkhelh a chawlhsan a, England Under 21-ah assistant coach hna chelh mekin tuna a hna thar hian a hna chelh lai hi a tibuai dawn lo.

Lampard-a'n Chelsea a enkawl ṭum pawh khan Cole hian Blues youth academy-ah coach hna a chelh. Everton manager Lampard chuan, "England U21 tana a hnathawh avangin coach zah kai a ni phak; tawnhriat ṭha tak a nei a, coach ṭha tak a nih bawk avangin kan hlawkpui khawp ang," tiin a sawi.

Alli leh Van de Beek
Everton-in Lampard an lakluh hnuah player hming langsar Delle Alli leh Donny van de Beek te an lalut nghal a, chutihrualin an player thar pahnih hi Tottenham leh Manchester United-a khelhna hmun chang tam lo ve ve an ni.

Kum 25 mi Alli hian Jose Mourinho, Nuno Espirito Santo leh Antonio Conte te hnuaiah hmun pawimawh a chang phak lo a, English midfielder hian a theihna sanzia lantir tawh mah se khelhna hmun a chang tlem hian ngaihtuah a ti thui.

Lampard chuan, "Alli hi ka hre chiang a, bul a rawn ṭan aṭanga a ṭhat chhuah dan thlengin ka hmu. Hun harsa a tawng a ni thei a, chhan hrang hrang erawh a awm thei ang. Ka hna chu a bul aṭanga ṭan ṭhattir a ni a, amah thlawp bakah a theihna anga a khelh theih nana fuih chu ka tih tur a ni," tiin a sawi a, Alli leh Van de Beek a nei thei chu a lawmawm a tih thu a sawi bawk.

Hmabak chu
Everton-in Premier League bikah chuan December 6-a Arsenal an hneh hnuah chak an nei leh tawh lo a, chutihrualin FA Cup-ah erawh January 8-a Hull City an hneh avangin fourth round hi an lut. Hull hi Championship club an ni a, table-ah 18-naah awm mah se Toffees hian hneh turin extra time khelh an mamawh.

Hull City an hneh hnu hian an tum tawk tura ngaih Norwich City leh Aston Villa te an hneh lo a, manager thar Lampard hi phurna petu a ni. Everton hian February 8, Thawhlehni zan hian Premier League-ah Newcastle an hmachhawn dawn a, inkhel pawimawh tak an hmachhawn hun atana infuih phur nan Brentford hi an hneh ngei a ṭul a ni.

Bees lam hi
Brentford manager Thomas Frank chuan, "Kan club history-a player kan lakluh ropui ber a ni thei a, Eriksen hi player ṭha chungchuang a ni. Khelmuala a luh hun a nghahhlelh awm a, chutihrualin Everton a la hmachhawn dawn lo. Man City (Feb 9 zan) kan hmachhawn hunah erawh a dinhmun kan hrechiang tawh ang," tiin Eriksen-a chungchang a sawi.

Everton ang thoin Brentford hi tun hnaiah an che ṭha bik lo a, league match hnuhnung paliah an chak lo vek. FA Cup fourth round lut tur hian League Two club Port Vale an hneh a, hna hautak an la hmachhawn lo.

Bees manager Thomas Frank hi Covid-19 positive vangin Toffees an hmachhawn hunah technical area-a awm lo thei dinhmunah a ding. Everton laka hnehna chang turin Ivan Toney te an chet ṭhat a ṭul dawn a ni.