Atletico hmaah Barcelona thar

Barcelona leh Atletico Madrid inkhel tur hi Champions League khel phak tur zawnna a ni. Ni e, season chawhnu lam tir lam chauh la ni mah se team ṭha pahnih hian La Liga nomawi an sawi ngam tawh lo.

Pathianni zan dar 8:45-ah Barcelona chuan Atletico Madrid an mikhual dawn, champion lai Atletico hian palina dinhmun an luah phak hram - an hnuaia awm chu Catalan club hi an ni, an inkarah point khat a awm.

Barca thar
Lionel Messi chu Paris Saint-Germain tan a khel tawh, ropui taka a khelh pui ṭhin Xavi chu Barca manager a ni tawh thung. An hun laia European football an thunun ṭhinna kha hmanlai a chang zo ta, tunah indinthar leh tumin hma an la mek.

Catalan club hian leiba an ngah, player ṭha lakluh viau mah se pawisa pek tur an nei tlem. An melh phak tawk chu Wolves forward Adama Traore a ni a, man nei loin Pierre-Emerick Aubameyang an la bawk. Nikum kha chuan Messi leh Antoine Griezmann an nei!

Manchester City aṭanga an lakluh Ferran Torres-a'n a club thar tan match thum a khel tawh a, a inlan leh pawh a rinawm. Traore leh Aubameyang te an inlan a nih pawhin minute 90 chu an la khel lo ang, khelmualah erawh an luh ngei a rinawm.

Barca academy chhuak Traore chuan, "Pathianni zan hian khelmualah ka theihna la lantir theih ka beisei," a ti. Memphis Depay leh Ansu Fati te hliam vangin an chawl mek a, chuvangin tlarhma lamah Barca thar kan hmuh chho ngei dawn.

Tlarhnung pawp
Atletico Madrid manager Diego Simeone hi tlarhnung ven thiam hmingthang a ni a, an hlawhtlinna bul pawimawh pawh a ni. Season hmasa khan league match 38 aṭangin goal 25 chiah an chhuah a, ropui takin league nomawi an chawi.

Mahse maw, season kal laiah hian match 21 aṭangin goal 26 an chhuah der tawh, season hmasa pumpuia an chhuah aiin a tam tawh. Argentina manager hlawh hnem hian a naute a remphui a ngai tawh, an insiamṭha lo a nih chuan Barca laka mualpho thei an ni ang.

Tlarhma lamah an fapa tlanbo Griezmann nei kir leh tawh mah se league match thum chauh a la khel - goal a la khung lo. Luis Suarez-a'n match 20 aṭangin goal sarih a khung a, Uruguay striker hian ram tana a feh chhuahna lama a chet ṭhat chu a club hlui lakah pawh chhawm a tum dawn.

Suarez hian Nou Camp a hrechiang a, hun rei tak a tal tawhna a nih bakah an manager Xavi nen an khel dun hman. Spanish manager tan kum 35 Suarez hi ven ngun ngai tur bik a ni dawn, amah dul loa hnawltu laka goal khung a hreh dawn lo.