Inter mualah Milan an lut dawn

An inkhelhna tur chu San Siro a ni a, tun ṭum atan chuan Inter Milan chu mualneitu an ni ang. Zanin dar 10:30 hian Milan Derby a awm dawn, Italian club lian pahnih Inter Milan leh AC Milan inkhel tur hi a hmuhnawm dawn.

Season hmasa khan team pahnih hi an inel tawk hle; season chawhnu lama fei zawk Inter kutah Serie A nomawi a awm. Kuminah pawh champion tum lai ve ve an ni a, hmahruaitu Inter tan dinhmun sawhngheh theihna remchang a ni ang.

Chutih rualin Milan tan Inter hnaih theihna hun a ni dawn thung. Stefano Pioli naute hian Inter hi point liin an phak lo mek, match khatin an khel tam bawk - zaninah an chak lo a nih chuan league nomawi beisei san ngam a harsa tawh dawn.

Milan hian striker palian Zlatan Ibrahimovic chu hliam vangin an chhawr thei lo mai thei, a inlan thei lo a nih chuan Olivier Giroud-a'n bul a ṭan thung ang. Ante Rebic leh Fikayo Tomori te an chawlh mek bawk avangin an ṭhat dan bera khelh a harsain a rinawm.

Inter pawhin Robin Gosens leh Joaquin Correa te an chhawr thei dawn lo. South America lama kal chhuak Lautaro Martinez chu kir leh tawh mah se, Argentina striker hi a chau mai thei - striker Edin Dzeko a pawimawh zual ang.

Tun kar tawp Serie A inkhel tur zingah Juventus leh Verona inhmachhawn turin ngaihven a hlawh bawk. Old Lady hian season kal laia league goal 17 khung tawh Dusan Vlahovic chu Fiorentina aṭangin an lalut. Serbian striker hi Pathianni zanah a inlan nghal a rinawm.

Italy - Serie A
Zanin Inkhel Tur
AS Roma 07:30 PM Genoa
Inter Milan 10:30 PM AC Milan
Fiorentina 01:15 AM Lazio

February 6, Pathianni
Atalanta 05:00 PM Cagliari
Bologna 07:30 PM Empoli
Sampdoria 07:30 PM Sassuolo
Venezia 07:30 PM Napoli
Udinese 10:30 PM Torino
Juventus 01:15 AM Verona