FIFA World Cup 2022 khel tur leh khel lo tur a hriat tawh em?

2022 FIFA World Cup chu kumin November 21 leh December 18 inkar hian Qatar-ah khelh a ni dawn a, thlasika World Cup khelh hmasak ber tur a ni.

FIFA hnuaiah khawmualpui paruk a awm a, quota neih dan pawh a la inang lo. World Cup-ah hian ram 32 an inlan dawn a, inelna thleng tur Qatar tiamin ram 15 an tling tawh.

Tling tawhte
FIFA-in December 2, 2010-a kum 2022 World Cup thleng tur a puan rualin Qatar an tling nghal. Qualifier khel zingah chuan Germany an tling hmasa bera a, vawi li champion tawh Die Mannschaft hi nikum October 11, 2021-ah an tling.

Germany tlin hnu ni khatah Denmark an tling ve leh nghal. South America aṭanga tling hmasa ber chu Brazil an ni a, nikum November 11 khan an tling. Selecao hi vawi nga champion tawhin record an nei ṭha ber a, South America aṭang hian vawi hnih champion tawh Argentina chu November 16 khan a tling bawk.

Europe-in November 16 khan World Cup khel tur zawnna thawh khatna a zawh avangin Qatar zin tur ram 10 a chiang tawh. Germany leh Denmark bakah France, Belgium, Croatia, Spain, Serbia, England, Switzerland leh Netherlands te an tling.

Asia aṭangin Iran an tling hmasa ber a, kumin January 27 khan a vawi ruk nan an tling. South Korea pawh February 1 khan an tling a, Taegeuk Warriors tan World Cup vawi 11 an khelhna tur a ni.

A la ngaihnawm
World Cup khel tura la tling lo zingah ram langsar an awm avangin qualifier khelh hmabak hi a la ngaihnawm dawn. March thla hian khawmualpui hrang hrangten qualifier an khel zo ang a, intercontinental playoff chu June 13-14 hian Qatar-ah khelh a ni ang.

UEFA aiawh tur zingah European champion Italy an la tling lo a, Azzurri hi playoff-ah Euro 2016 champion Portugal nen an inhmachhwn theih avangin tu emaw zawk hi an tla dawn. Khawvel player ṭha ber zinga mi Cristiano Ronaldo chu World Cup khel thei lo dinhmunah a ding mek a, football thiam ram Italy pawh an dinhmun a chiang chuang lo.

Asia ram aṭangin Saudi Arabia, Japan leh Australia ten hmunruak pahnih an inchuh mek a, ram pathumte hi an la intum dawn avangin March thla tawpa khelh tur qualifier a hmuhnawm dawn. Chutihrualin team vanduai ber hian playoff an la khelh theih avangin an vai hian Qatar-ah kan hmu vek thei bawk.

Africa aiawh tur zawn nan third round khelh a la ngai a, ram 10 ciah an awm tawh. Amaherawhchu Mohamed Salah telna Egypt leh Saido Mane telna Senegal te an inhmachhawn dawn a, AFCON finalist pahniha pakhat zawkin World Cup an khel thei dawn lo tihna a ni.

World Cup 2022 - Thlirna Tawi
Asia (Host + 4.5)
• Qatar-in inelna an thleng dawn.
• Group A aṭangin Iran leh South Korea an tling tawh.
• Group B aṭangin Saudi Arabia, Japan leh Australia ten beisei an la nei vek
• Group A leh B pathumna ve ve ten playoff a khel ang a, chuta chak chuan South America-a panga nen inter continental playoff an khel ang.

Africa (5)
• Africa-in quota panga an nei.
• Team 10 an la dam a, heng team 10 hian double legged playoff hmangin Qatar zin tur an zawng ang.
• Team inhmachhawn dan tur chu Egypt vs Senegal, Cameroon vs Algeria, Ghana vs Nigeria, DR Congo vs Morocco, Mali vs Tunisia.

North, Central American & Caribbean (3.5)
• CONCACAF-in quota 3.5 an nei a, tling chiang an la awm lo.
• Team pariat zinga pathum an tling nghal ang a, palinain Oceania khawmualpuia pakhatna nen playoff an khel ang.
• Third round khel team pariat zingah Canada-in match thum khelh hmabak la awmah a chhe berah playoff an khel chiang tawh a, ram dang United States, Mexico, Panama leh Costa Rica ten beisei an la bawk.
• El Salvador-in playoff an la beisei thei a, Jamaica leh Honduras ten beisei tur an nei tawh lo.

South America (4.5)
• South America-ah ram 10 an awm a, quota 4.5 an nei.
• Brazil leh Argentina an tling tawh a, Ecuador-in a chhe berah playoff an khel dawn.
• Uruguay, Peru, Chile leh Colombia ten Qatar khelh beiseina an la nei vek. Bolivia erawhin a ṭha berah playoff bak an khel thei tawh lo.
• Paraguay leh Venezuela ten beisei tur an nei tawh lo.
• South America-a pangana hian Asia aiawh nen playoff an khel dawn.

Oceania (0.5)
• Oceania-in anmahni pualin quota an nei lo a, World Cup khel turin playoff an paltlang a ṭul.
• Oceania aiawha playoff khel tur hi March thlaah an la zawng dawn chauh.
• Ram pariat chu group hnihah ṭhen an ni a, group A-ah Solomon Islands, Tahiti, Vanuatu leh Cook Islands te an awm. Group B-ah New Zealand, New Caledonia, Fiji leh Papua New Guinea te an awm.
• Group tin hi vawi khat ṭheuh an inkhel chhuak ang a, a sang pahnihin semifinal an lut ang.
• Oceania champion hian CONCACAF-a palina nen playoff an khel dawn.

Europe (13)
• Europe-in quota 13 an nei.
• Ram 10 an tling tawh. Chungte chu Germany, Denmark, France, Belgium, Croatia, Spain, Serbia, England, Switzerland leh Netherlands te an ni.
• Ram 12-in hmun ruak pathum an la zawng dawn.
• Path A-ah Scotland Vs Ukraine, Wales Vs Autria ten an awm a, semifinal leh final a awm ang. Path aṭangin ram pakhat World Cup khel turin an tling ang.
• Path B-ah Russia vs Poland, Sweden Vs Czech Republic te an awm a, Patch C-ah Italy vs North Macedonia, Portugal vs Turkey te an awm bawk.