Weghorst-a'n Burnley a chhan thei ang em?

Zanin dar 11:30 hian Burnley leh Watford ten Premier League inkhel pawimawh tak Turf Moor-ah an khel dawn. Burnley hi table mawngphaha awm an ni a, an khingpui tur Watford hi an chung chiahah awmin point hnih chauhin an inthlau.

Clarets hi relegate thei dinhmuna ding zinga mi Newcastle United-in an striker rinrawl Chris Wood an chhuhsak a, amaherawhchu Sean Dyche-a'n Dutch striker Wout Weghorst a lakluh theih avangin January transfer-a thil thleng vangin a indawm kun bik lo ang.

Kum 29 mi Weghorst hi feet ruk leh inches ruka sang a ni a, Bundesliga club VfL Wolfsburg tan league match 118 a khelhah goal 59 khung thei a ni. Chutihrualin Burnley dinhmunin a zir loh avangin Weghorst tan a la khelh ngai lohna Premier League-ah a che ṭhat nghal a ṭul a, Watford hmaah fiahin an awm ang.

Watford hian manager Claudio Ranieri thlakin kum 74 mi Roy Hodgson an lalut a, Liverpool leh England manager hlui Hodgson tan tlarhnung thuam ṭhat chu a hna hmasa tur a ni. Hornets hian tun season-ah goal 40 an chhuah tawh a, anmahni aia chhuah tam chu Norwich City (45) leh Newcastle United (43) te chiah an awm.