Diaz hi player ṭha tak a ni - Tsimikas

Liverpool defender Kostas Tsimikas chuan FC Porto aṭanga an lakluh thar Luis Diaz chu player ṭha tak a nih thu a sawi a, "Kawng tam takah he team hi a puih theih ka ring tlat a ni," tiin Merseyside club tana a khelhpui tur hi a ring tawk hle.

Reds hian thlasik transfer-ah Diaz hi pound maktaduai 37.5-in an lalut a, kum nga chhung atan contract ziah puiin, a man hi a khelh ṭhat dan a zira pound maktaduai 12.5 pek belh leh tur a ni ang.

Tsimikas chuan, "Team a rawn zawm hun kan nghakhlel em em a, Porto nen Champions League group stage-a kan intawn ṭum khan an player ṭha ber niin ka hria. A lo thlen hun ka nghakhlel a, kawng tam takah he team hi a pui thei ang tih ka ring tlat a ni," a ti.

Greece international chuan sawi zawmin, "Ngaihtuahna sen buai vak ai chuan attack a, mahnia goal khung pawh tum ngam mai ṭhin a ni a, a team tana thawhhlawk a duh ṭhin. Anfield-ah pawh kha zia tho kha kan hmuh ka beisei," a ti a, Colombian winger lakah beiseina a nei sang hle.

Liverpool hian Pathianni tlai dar 5:30-ah FA Cup fourth round khel turin Cardiff City an mikhual dawn a, AFCON final khelh tur nei Mohamed Salah leh Sadio Mane te chu la tel lo tur chiang an ni a, Diaz pawh la hahdam rih tura ngaih a ni.

Kum 25 mi Diaz hian tun season-ah Porto tan inelna hrang hrangah match 28 khelin goal 16 a khungsak hman a, assist vawi ruk a nei bawk - Reds fans leh player ten beiseina an nei sang hi a awm lo hran lo.