Thiem a lo kir dawn hnai

Dominic Thiem hliam a dam chho zel a, hun rei vak lo hnuah a inkhelh theih a rinawm. US Open champion hlui hian harsatna dang a neih loh chuan March thla a khelh tur Indian Wells Masters khelh a tum thu a team chuan an sawi chhuak.

Kum 28 mi Thiem hi a banrek hliam vangin thla sarih ngawt a inhliam tawh. Vanglai a hmang chho mek a, player lian dangte tana elpui hautak a nih lai taka hliam na tak a tuar hi atan a pawi thui thei hle - ṭha taka inkhelh leh pawh a harsa mai thei.

Austrian star Thiem a team chuan thuchhuah siamin, "March thlaah Indian Wells a khelh theih kan beisei," an ti. An beisei anga thil a thleng a nih chuan a inkhelh thiamna clay court season a hmang hman dawn.

World number 3 pawh ni tawh, mahse tun dinhmuna world number 37 ni ta Thiem chuan, "Thla sarih hnua inelna hmachhawn leh chu a awlsam dawn lo, doctor thurawn anga ka awm zel a ngai dawn. Tuna ka tih theih chin chu theihtawp chhuaha training a ni," tiin a sawi.

Indian Wells tourna-ment hi March 9-20 chhunga khelh tur a ni. Season kal mek chhunga Grand Slam pahnihna French Open chu May thlaah an khel dawn, a lan dan chuan Paris khawpuiah ṭha takin a inkhel thei tawh ang.