I League-a Aizawl FC champion puitu coach Khalid Jamil chuan Mohun Bagan enkawlin Inrinni khan Rajiv Gandhi Stadium, Mualpuiah a club hlui AFC chu 2-1 in an hneh.

Mariners tan Henry Kisekka (22') leh Bikramjeet Singh (78') ten goal an khung a, minute 38-naah Ansumana Kromah-a'n Mizo club tan khung mah se point hlawhchhuah nan a tawk lo.

Aizawl FC-in coach thar Standly Rozario hnuaiah hma an sawn tih hrechiangtu Khalid Jamil chuan an khingpui aia player an nei ṭha zawk chungin goal venhim tumin player a rem. Mizo tlangval Lalchhawnkima tiamin tlarhnungah defender panga a rem a, defence pui tura a dah Eze Kingsley pawh Aizawl FC champion ṭuma defender rinrawl niin Khalid hian point khat hlut zia a hrechiang.

Tlarhmaah captain Sony Norde, Asier Pierrick Dipanda Dicka leh Henry Kisekka te an intlar a, Aizawl FC foreigner nena khaikhinin an inthlau hle.

Squad thlirin Bagan an chungnung a, khelmualah erawh an chungnung bik lo. Tlarhnung mutthluk zeuh vangin Henry Kisekka chuan Bagan hmahruaina goal a khung. Goal an chhuah hnuah Mizo club buai phah chuang loin an goal nawr a na sawt a, Kromah-a'n mawi takin an siphurh a sut. Amaherawhchu goal dang khung belhna hun ṭha erawh Paul Ramfangzauva leh Isak Vanlalruatfela ten an hlah.

Team pahnih an inkhel tawk a, minute 12 chiah khelh tur a awm tawh tihin Norde freekick pet chu ven ṭhat loh Bikramjeet-a'n a khung a, Mohun Bagan chakna goal a ni.

Mohun Bagan coach Khalid Jamil chuan, "Goal kan chhuah kha pawi kan ti a, kan tum ber point thum erawh kan hlawh chhuak. Point thum hmuh kha kan phu a ni," tiin Vanglaini a hrilh.

Mariners hian match 17-ah point 26 hmuin parukna dinhmun an luah a, champion erawh a beiseiawm tawh lo. Khalid hian inkhelh ban press conference-ah hian a hma lam hun thlir chungin a lei a veng ṭha hle.

Aizawl FC coach Standly Rozario chuan, "Point khat chauh ni loin point thum hlawh chhuak thei kan ni a, tawnhriat neih tlem vanga kan chetsual kha Bagan-in an vanneih pui," tiin chak thei an nih thu a sawi a, inkhel entu mipuiin an ṭawmpui ang.