East Bengal nomawi beiseina tinungtu Didika

India ram club hlun leh lian East Bengal-in I League nomawi an la chawi lo a, tun season-a an champion theihna hun ṭha chu nizan khan Churchill Brothers lakah thamral ṭhelh mah se Mizo tlangval Lalrindika Ralte-in chhan chhuakin Goan club nen 1-1 in an inhnehtawk.

Salt Lake Stadium-ah entu 43,768 zet an pung khawm a, a chhan chu East Bengal-in hmahruaitu Chennai City point hmuh zat 34 an hmuh theih dawn vang a ni. Red and Gold tan Shillong Lajong-a hattrick siamtu Laldanmawia Ralte bakah captain Didika Ralte leh Lalramchullova ten bul an ṭan a, Brandon VL Remdika bench-ah a awm thung.

Hun chanve hmalamah Kolkata club Mexican forward Enrique Esqueda chuan vawi tam Goan club tlarhnung rum ṭhaih mah se goal a keng tel lo a, Danmawia pawh goal hmaah a vannei bik lo.

Amaherawhchu second half-ah minute 68-naah Spanish defender Borja Gómez tihsual hmang ṭangkaiin Willis Plaza-a'n Churchill tan a club hlui lamah a khung. East Bengal champion beiseina a tawp hnai niin a lang hman a, substitute Brandon-a'n freekick a hlawh chhuak. Captain Didika'n freekick hi petin Kassim Aidara chuan a khawih feih a, East Bengal-in minute 78-naah an siphurh an sut. Didika thawhrah ni mah se a tawpa khawihtu Aidara hmingin goal hi kaltir a ni.

Kolkata club-in point khat chauh an hlawhchhuah avangin hmahruaitu Chennai City chu point hnihin an pha lo. South Indian club hian vawiin tlai dar 5:00 hian Shillong Lajong an hmachhawn dawn a, East Bengal hian February 25-ah Mizo club Aizawl FC an mikhual ang.