Man City kan quadruple thei ang - Foden

Manchester City chuan Inrinni zan khan League Two club Newport County 4-1 in an hneh a, FA Cup quarterfinal an lut. 

League Two club squad hlut­na belhkhawm hi £70,000 lek a nih laiin City erawh an team rem khawm tur hian pound maktaduai 450 bawr vel an seng a, heti taka an inthlau chung hian Rodney Parade-ah Pep Guardiola hoten goal khung an harsat a, Newport hian first half-ah goal an chhuah lo. 

Second half-ah erawh player ṭha zawk ṭhatna a lang a, Leroy Sane chuan mi­nute 51-naah khungin Phil Foden chuan minute 75 leh 89 inkarah a khung. FIFA World Cup Under 17 hnuhnung best player goal khung inkarah hian Newport tan Padraig Amon-a'n khung ve mah se Riyad Mahrez-a'n injury time-ah City goal lina a khung.

Goal hnih khungtu Foden chuan, "City hian tun season-ah nomawi pali (quadruple) kan chawi thei ang. Tun dinhmuna chuan engkim a kal tluang a, hmabak erawh a harsa ang," tiin a sawi.

Manchester City hian Nilaini zan hian Champions Legue last 16-ah Schalke an hmachhawn dawn a, February 24 zanah Chelsea nen League Cup final an khel ang.

FA Cup inkhel dangah Premier League club Brigh­ton & Hove Albion chuan Falmer Sta­dium-ah Derby County 2-1 in an hneh a, Frank Lam­pard-a enkawl Rams tan veretan defender Ashley Cole chuan goal a khung a, result erawh a danglam phah lo. English defender Cole hi Lampard nen England leh Chelsea tan khel ho ṭhinin kum 38 mi a ni tawh.