Real Madrid an tlawm - nomawi a bo tawh?

Pathianni zan La Liga inkhelah Real Madrid chuan 1-2 in an mikhual Girona an ngam lo a, league nomawi an beiseina chu a thamral tawh anga sawi theih a ni. 

Santiago Bernabeu-a Real-in hnehna an chan zawh loh laiin Barcelona leh Atletico Madrid erawhin Inrinni zan khan an khingpui ve ve an hneh a, Los Blancos hi pathumnaah an tla thla zui.

Barca hian Real Valladolid chu Lionel Messi penalty hmangin 1-0 in an hneh a, Atletico hian Antoine Griezmann goal hmangin Rayo Vallecano chu 1-0 in an hneh a, Cristiano Ronaldo hralhtu Real Madrid erawhin chhantu an nei lo.

Barcelona-in table chung ber an luah chhunzawm zel a, Real Madrid aia an sanna chu point kua ngawt a ni leh tawh. Atletico-in pahnihna dinhmun aṭangin Real an pet chhuak a, an khaw club aia an sanna chu point hnih a ni.

 

Girona-in inkhel ṭantir lamah Real ngam viau mah se Real Madrid hian minute 25-na leka Casemiro goal khung hmangin hma an hruai a, hun rei tak goal dang a luh loh avangin Real hi chak tura ngaih an ni. 

Mahse, minute 65-naah Sergio Ramos chuan goal tura ngaih ball chu a kutin a tawk fuh a, referee-in penalty a ham zui. Cristhian Stuani chuan hlauhthawnna nei loin 'cool' takin a pet lut. Real-in goal an chhuah hnuin an insiamṭhat phah lo. 

Girona attacking midfielder Portu chuan minute nga hnu lawkah crossbar a pet per zui a, minute 74-naah erawh a hlawhchham nawn lo - Anthony Lozano shot chu Thibaut Cortouis-a'n lo dang per mah se Portu hian a per lehlam a tauh lut a, Real fans an hawihai. 

Hun a tlem tawh avangin Real fans an hlauthawng a, goal hmuh ngei duh mah se minute 90-naah an hmuh duh loh zawk an hmu - Sergio Ramos chu a yellow card pahnihna avangin hnawhchhuah a ni a, player 10-a khel Real tan thawh ngaihna a awm tawh lo. 

Barcelona tana goal khungtu chu Lionel Messi bawk a ni a, mahse tun ṭum erawh thawnthu dang a tel - Barca goal awmchhun hi penalty aṭanga a chhuih luh a ni a, penalty an hlawh dang erawh a pet goal lo.

Catalan club penalty hmasa zawk hi Gerard Pique hlawhchhuah a ni a, a hnuhnung zawk hi tun hnaia tlatlum lo Philippe Coutinho hlawhchhuah a ni thung.

Real Valladolid tan goalkeeper Jordi Masip chu player langsar a ni a, Messi leh Luis Suarez-te vawi tam a dang - Ousmane Dembele leh Kevin-Prince Boateng te hun neih ṭhat chu a dang bawk. 

Messi ropuina erawh sawi nep theih a ni lo. Barcelona captain hian tun season-ah goal 30 a khung tling leh der tawh a, a season hnuhnung 11-ah goal 30 khung tlin loh a nei ngai lo!

League match hnih chhung a zawna hnehna an chan zawh loh hnuah Atletico Madrid-in hnehna an chang ve leh ta a, an mikhualna ramah Rayo Vallecano chu 1-0 in an hneh. 

Atletico goal neihchhun hi Antoine Griezmann khung a ni a, French striker goal khung hi Spain-a a kir hnua goal la khung lo Alvaro Morata siamsak a ni. Kum 27 mi Griezmann hian tun season-ah goal 18 a khung tling ta der.

Diego Simeone-a team te hian hnehna an chan ve leh tak avangin nomawi chawi thei turah sawi bo an la rem lo a, club tana rinawmna thu tiam thar Simeone hian kut ruaka season khar a duh dawn lo - Barca an la hmachhawn dawn. 

Atletico hian Nilaini zanah Champions League last 16 first leg khel turin Juventus an mikhual dawn a, inrintawkna an mamawh lai taka hnehna an chang ve leh ta hi fan-te tan a lawmawm lehzual ang.