Pune hmaah Jamshedpur an thamral

Inrinni zan khan Indian Super League inkhelah Pune City chuan an mikhualna ramah 4-1 in Jamshedpur FC an sawp a, JFC tan a sang pali zinga tel turin beiseina a tlem ta hle. 

Pune City tan Robin Singh chuan goal hnih a khung a, Marcelinho leh Ashique Kuruniyan te chuan goal khat ve ve an thawh bawk. 

JFC tan minute 76-naa Carlos Calvo-a'n penalty hmanga a khung ve meuh chuan goal li an chhuah fel der tawh a, comeback zo tawh loin 4-1 in an tlawm - JFC tan hian Malsawmzuala chu minute 38-naah luhtir ni mah se inkhel a thlak danglam thei lo. 

Zirtawpni zan inkhelah Kerala Blasters chuan an vawi khat chakna an tawng a, Chennaiyin FC chu 3-0 in an sawp. Blasters tan Matej Poplatnik chuan goal hnih khungin Sahal Abdul Samad chuan goal khat a thawh ve bawk. 

Chennai club tan Laldinliana Ren­thlei leh Jeje Lalpekhlua ten inkhel bul an ṭan a, second half-ah Isaac Van­mal­sawma chu bench aṭanga luhtir a ni. 

Kerala Blasters hi zaninah an inlan lehnghal dawn a, dar 7:30-ah FC Goa an lenchilh ang.