Mizoram hnung zuitu Manipur

Santosh Trophy North East Zone Qualifying round chu Inrinni khan khelh zawh a ni a, Assam chuan Manipur 2-1 a hnehin final round an lut. Hmarchhak football powerhouse tia sawi ṭhin Manipur pawhin tun hnaia hmarchhak team ṭha bera ngaih Mizoram hnungzuiin Santosh Trophy beiseina a tawp.

Lammual inkhelah chak mamawh Manipur-in minute 42-naa Ginminthang Hansing goal hmangin hma an hruai a, amaherawhchu Assam-in minute 63-naah Milan Basumatary hmangin an sut. An inhnehtawk lai hian Assam dinhmun a ṭha zawk a, injury time-ah Bishnu Bordoloi chuan chakna goal a khung a, Manipur an pet chhuak.

Santosh Trophy final round khel tur team 10 a hriat tawh a, chungte chu Assam, Delhi, Goa, Karnataka, Maharashtra, Meghalaya, Odisha, Punjab, Services leh Sikkim te an ni a. Champion ngun ber West Bengal leh nikum champion Kerala bakah hmarchhak team ṭha pahnih Mizoram leh Manipur ten qualifying round an paltlang lo thung.