Chelsea khingpui tur Man United

Zanin dar 1:00 hian Chelsea leh Manchester United te Stamford Bridge-ah an inhmachhawn dawn a, FA Cup fifth round inkhel tur hi nikum final replay tih pawhin a sawi theih.

Season liam ta khan Antonio Conte hoten Eden Hazard-a penalty hmangin Jose Mourinho kaihhruai Manchester United an hneh a, London club-in Wembley Stadium-ah FA Cup an chawi. Tun ṭumah erawh Blues enkawltu hi Maurizio Sarri a ni a, United hi Ole Gunnar Solskjaer hnuaiah an khel thung.

Chelsea hian Manchester City lakah mangchhia an tawng a, 6-0 zeta an mualpho hnuin Europa League-ah Malmo 2-1 in an hneh. Blues hian Malmo an hmachhawn ṭumin Ruben Loftus-Cheek leh Marcos Alonso te an chhawr thei lo a, United nen an inlan thei tawh ve ve ang.

Manchester United pawhin Norwegian manager hnuaiah hneh loh an tawng a, Neymar leh Edison Cavani tel lohna Paris Saint Germain chu Old Trafford-a 2-0 in an hneh lo. United hian Champions League inkhela inhliam Anthony Martial leh Jesse Lingard te an chhawr thei dawn lo a, full back pahnih Matteo Darmian leh Antonio Valencia te hman theih an la ni lo bawk.

Solsjkaer-a'n engtin nge player a siksawi dawn tih a hriat loh a, rawlthar pahnih Tahith Chong leh Angel Gomes te pawh khel thei tur zinga sawi an ni. United manager Solsjkaer chuan, "Kan thawhchhuah a ngai a, khualmualah Chelsea kan khelh dawn avangin a harsa ang," tiin a sawi.

Chelsea hian FA Cup-ah a zawnin vawi nga United an hneh tawh a, Blues hi City laka goal ruk chhuahtu ni mah se Eden Hazard-a awmna a ni a, Italian manager Sarri hnuaiah sum an sen tam bawk avangin an buk a rit zawk. United hi an chak zo lo a nih chuan manager ni nghet tura sawi tawh Solsjkaer hmalam hun hi ngaihtuah ṭhat leh a ṭul ang.