RFL Plastics MFA Futsal League Tling tur leh tla tur inthliar ṭan

RFL Plastics MFA Futsal League round 5 chu khelh zawh a ni tawh. Zirtawpni zan khan Electric Veng YMA Indoor Stadium-ah IDBI Capital FC, Tuikual North chuan group B hma­hruaitu ni turin FC Leitan chu 6-4 in an hneh. Mizoram chhung futsal inelna sang berah hian group khat aṭangin team paliin knockoutstage an lut dawn a, round hnih chiah khelh hmabak an awm tawh avangin tling tur leh tla tur an hriat ṭan.

Group B-ah Tuikual North club IDBI Capital chuan quarterfinal an luh ngei a rinawm tawh a, hmunruak pathum dang hi Zonuam FC, FC Bungkawn, Ramthar club Whetstone FC, Chhinga Veng FC leh Electric Veng FC ten an inchuh dawn. Inelna neihna hmun EFC hian round 4 zawha hmahruaitu Zonuam FC an draw theih avangin knockout luh beiseina a la nung zel.

MFA Futsal League hi February 19, Thawhlehni zan khan khelh chhun­zawm a ni dawn a, group A te an inlan dawn. Group B hian February 20, Nilaini zanah round 6 an khel thung ang.