Augsburg lakah Bayern tho chhuak

Bayern Munich chuan an mi­khualna ramah Augsburg lakah ṭum hnih ngawt goal phur hmasa mah se an tho chhuak thei a, German champion hian 3-2 a hnehna changin an chunga awm Borussia Dortmund chu point hnih chauhin an phak lo ta. Mahse Nicko Kovac-a naute hian match khatin an khel hnem zawk.

Zirtawpni zan inkhelah Bayern midfielder Leon Go­ret­zka-a'n minute khatna lekah anmahni lam­ah a ti lut a, Bundesliga-ah mahni lama ti lut rang ber a ni! Minute 17-naah Kingsley Coman chuan a sut a, minute ruk hnu lekah Ji Dong-won chuan a vawi hnih nan Augsburg hma a hruaipui.

France international Coman bawkin chawlhlawk hmain an siphurh a sut a, second half tir lamah David Alaba-a'n chakna goal a khung bawk. Goal hnih khungtu Coman hi a kerek na vangin khelmual chhungah buaipui a ngai a, mahse Thawhlehni zana Liverpool nen Champions League last 16 an khelh hunah erawh inlan thei tura ngaih a ni.

German champion Bayern chuan an player chungchang sawiin, "Chanchin ṭha kan nei, doctor chuan Kingsley Coman a dam ṭha tih a puang, harsatna nei loin a inkhel thei ang," tiin tun season match 15 a khelh aṭanga goal nga khung tawh Coman chuan Reds a hmachhawn theih tur thu an puang.