Juventus an sang zual zel

Paulo Dybala, Leonardo Bonucci leh Cristiano Ronaldo te goal hmangin Juventus chuan Zirtawpni zan khan an mikhual Frosinone 3-0 in an sawp a, Italian champion hian match khata khel hnem zawk chungin pahnihna Napoli chu point 14 ngawtin an tlansan ta.

Allianz Stadium-a inkhelah Dybala chuan Ronaldo hnen aṭanga a ball hmuh chu minute rukna lekah box pawn aṭangin mawi takin a pet kum lut a, minute 17-ah defender Leonardo Bonucci-a'n an goal hnihna khungin Turin club chu dinhmun ṭha takah a dinpui.

Second half-ah Ronaldo-a'n tun season chhunga inelna hrang hranga a goal 21-na khungin, striker Mario Mandzukic chuan goal khung ve lo mah se Juventus goal nawrna kawnga tha thawhtu pawimawh a ni bawk.

Kan inpeih

Serie A hmahruaitu Juventus hian Champions League last 16 khel turin Nilaini zanah Atletico Madrid an lenchilh dawn a, Frosinone an hneh hnuah Italian manager Massimiliano Allegri chuan Spanish club hmachhawn tura an inpeih tawh thu a sawi.

Juventus manager Allegri chuan, "Kan dinhmun hi a ṭha tawk hle, thla tira Parma laka goal thum kan chhuah hnuah kan insiamṭha a, a bik takin tlarhnung a phui leh tawh hle. Bonucci leh Chiellini an din dun hi chuan kan khingpuite tan sut tlang an harsa a ni," a ti. Turin club hian an match hnuhnung pahnihah goal ruk an khung a, goal an chhuah lo thung.

Tlarhma lam sawi zawmin Alleg­ri chuan, "Dybala-a'n goal mawi leh ṭha tak a khung a, a dan pangngaiin Ronaldo a che zel bawk. Atletico Madrid nen kan inkhelh hunah pawh goal khung kan tum dawn. Serie A nen a danglam dawn tih chu ka hria, mahse kan tan chuan chona ṭha tak a ni zawk," tiin a sawi.