Santosh Trophy qualifying round - North East Zone-ah Mizoram chuan nimin khan match hmasa ber an khel a, Tripura 3-0 chauha an hneh avangin match hnuhnung bera Meghalaya nen an inkhel tur a hmuhnawm sawt ang.
Mizoram leh Meghalaya ten February 15, Zirtawpni hian group match hnuhnung ber an khel dawn. Team pahnih hian point thum ve ve hmuin goal thum ve ve an khung a, goal an chhuah loh ve ve bawk avangin final round khel tur an zawn hunah hian an inhnehtawk a nih chuan penalty shootout hmangin chak zawk zawn a ṭul ang.
Engtin nge an inrem?
Mizoram coach Lalsangzuala Hmar-in a sawi lawk angin starting eleven-ah MC Malsawmzuala, Lalromawia leh Lalliansanga (Notea) te chu bul a ṭan tir a, mual sir aṭanga nawr turin Ramhlun-chhunga leh Vanlalbiaa Chhangte an awm.
Defensive midfield-ah KC Larchhuak-mawia chu awmin defence-ah captain PC Laldinpuia, Vanlalzuidika, Immanuel HS Lalṭhazuala leh Lalchhuanmawia te an intlar a, keeper-ah RS Lallawmzuala a awm.
Inkhel bul ṭantu 11 zinga pali keeper Lawma, right back Chhuanmawia, midfield KC-a leh winger Chhunga te chu Under 21 player an ni a; hming langsar zinga mi MS Dawngliana chu Tripura hmachhawn tur zingah a tel lo.
A goal hma
Mizoramin bul an ṭan ṭha tawk lo a, Tripura lamin goal hlauhawm nei hmasain crossbar an pet per a, hlauhthawnna tur erawh a awm lo.
Dinglam sira awm Mabiaa'n ball ṭha vawrh lut thei lawk lo mah se Hriangtlang tlangval ball vawrh hmuh hmasak ber chu Ramhlunchhunga'n minute 15-naah a tauh lut.
Mizoram hian an goal khung hma an chhawr ṭangkai thei lo a, an chance ṭha neih chu Durtlang tlangval Notea'n a hlah ve ve. Samlukhai tlangval Romawia ball pet ṭha tak chu Tripura keeper Amit Jamatia chuan Notea zawnah tak tiper mah se goal khung nan an hmang ṭangkai thei lo a, hei hi first half-a chance ṭha ber tiin a sawi theih.
Mizoramin ball chang tam mah se first half-ah chance ṭha an insiam tam lo a, minute 45 chhungin goal khat bak a lut lo.
Goal hnih dang
Second half-ah pawh Mizoramin goal an khung hma a, ṭan aṭanga minute ngana lekah penalty an hmuh chu hmang ṭangkaiin MC-a'n keeper bum nan a hmang.
Hemi hnu hian Chhunga'n a chance ṭha neih chu goal zawnah a tauh thei lo a, minute 60-naa Kawrtethawveng rawlthar Chhuanmawia crossball ṭha bik erawh Chhunga'n a tauh goal mawi hle.
Mizoramin goal dang khung belh turin darkar chanve dang an nei a, mak takin goal an khung belh lo. Inkhelh thlak danglam tumin bench aṭangin Lalmuansanga, David Laltlansanga leh Ṭhasiam-te an lut nachungin goal an keng tel lo.
Tripura keeper Amit Jamatia chuan first half ang thoin Romawia goal khung tur ṭha takin a dang a, nimin inkhelah a khel ṭha ber ang hiala sawi theih a ni.
Chutihrualin injury time-a substitute David-a'n keeper chiah a hmachhawn hnua awlsam taka thun theihah goal ban a pet per avangin Mizoramin goal li tal khung an beiseina chu a thamral.
20% chauh
Mizoram coach Lalsangzuala Hmar chuan, "Kan khelh danah insiamṭhatna tur a tam hle. Tripura hmaah kan theihna 20% chauh kan lantirin ka hria a, kan khelh danah ka lawm lo," tiin an khelh danah a lungawi lo.
Meghalaya nena an inkhel tur thlirlawkin Sanga chuan, "Match hnuhnung bera kan chak chuan a tawk a, hnehna chan ngei kan tum ang. Final round kan thlen ngei theih nan Mizo mipui ṭawiawmna ṭha kan mamawh," tiin Vanglaini a hrilh.
Santosh Trophy ni thum khelh tawhah niminah entu an la tam ber a, Mizoram leh Meghalaya inkhelh hunah an tam lehzual ang.
