Chelsea leh Arsenal zin kawng a hautak ṭan dawn

Zanin aṭangin Europa League last 32 khelh ṭan a ni dawn a, Premier League lama beisei phak lo pahnih Chelsea leh Arsenal-te tan season duhawm lo an hman hliahkhuh theihna tur hun a nih avangin a pawimawh - knock out a nih tawh dawn avangin awlsam taka nuai liam mai theih tur erawh a ni lo ang.

Europa League-ah hian Champions League group stage paltlang zo lo an inlan chhunzawm ṭhin - Bayern Leverkusen, Sevilla, Inter Milan leh Napoli ten an belh tawh avangin champion a awlsam dawn lo a, club tinin an tum ber erawh nomawi chawi chunga season thar UCL ticket neih a ni.

Maurizio Sarri-a'n bul ṭan fuh pui viau mah se tun hnaiah Chelsea an zuih a, zanin dar 1:30-a an hmachhawn tur Malmo erawh hneh tura ngaih an ni. Swedish club nen hian tun hmain UEFA hnuaia inelna huangah an la inhmachhawn ngai lo - a vawi khatnaah chak an duh dun ang.

Manchester City laka mual­pho hlim Blues tan a zawna result duhawm lo neih a thiang lo, an chesual hlauh a nih chuan an manager dinhmun thlengin a nghing zui thei tura ngaih a ni; hnehna an chang a nih erawh chuan boruak rit zualpui a ziaawm dawn.

Chelsea midfielder N’Golo Kante chuan, "Man City laka kan chet dan kha chu pawm thiam theih loh a ni. Mahse, kan duh loh a ni nachungin kan chungah a thleng miau si, a pawm dan kan thiam mai a ngai. Kan hma hunah chuan khatiang kha a thlen nawn tawh loh ka beisei, Malmo nen kan inkhelh hun aṭangin result duhawm zawk kan hmuh ka ring," a ti.

Italian manager Sarri naute hian tun hnaiah match an khel hautak chho dawn hle, Europa League bakah hian Manchester United nen FA Cup-ah an intawng dawn a, tun thla chhung thoin Man City nen League Cup final an khelh dawn bakah; UCL khel tura an elpui Tottenham nen league match pawimawh an khel dawn bawk a ni.

Europa League bikah chuan Blues hian Group L match bika a zinchhuah hoah chak loh an nei lo, an record ṭha tak hi tun ṭumah pawh an hmachhuan leh tur a ni dawn; Sarri-a'n hnehna chan pawimawh zia hriain a player neih ṭhat ber a thawhchhuahpui ngei a rinawm.

Juventus aṭanga loan hmang­­a an hawh Gonzalo Hi­guain chu a ṭul a nih chuan chhawr theih a ni dawn, tun season aṭangin UEFA-in dan an siam tharah January thla an player lakluh pathumin club pahnih tan season khatah inelna ngai an hmachhawn thei tawh.

Man City laka che thei lo Higuain nge Europa League a khelh hnuhnung pathuma goal li khung thei Olivier Giroud a rin zawk ang tih chu zawhna lian tak a ni a, Ruben Loftus-Cheek, Callum Hudson-Odoi leh Willian ten hmun an chan a beiseiawm bawk.

Arsenal manager Unai Emery-a'n season tir khan an team dinhmun a hrechiang a, Premier League nomawi ai chuan palina chin nih an tum tur thu a sawi ngam. Spanish manager hian league chu an ngaih pawimawh ber ni mah se Europa League chu UCL khelh theihna tur kawng ṭha tak a nih thu a sawi bawk.

EPL table-a pangana nilai Gunners tan palina nih beiseina a la sang a, mahse a awlsam dawn lo. Sevilla a enkawl laia Europa League nomawi vawi thum chawi tawh Emery hian zaninah pawh a hmanraw neih ṭhat a chhawp chhuah a rinawm.

Zanin dar 11:25 hian Bori­sov Arena-ah BATE an lenchilh dawn a, Belarus club lakah hian goal chhuah loa hnehna an chang a nih chuan an khelmuala second leg khelh a awlsam phah dawn - goal chhuah tlem a pawimawh ang.

Khualmuala result nei ṭha thei lo Arsenal hian a zawna league match vawi thum chhung an mikhualna rama hnehna an chan theih loh hnuah, an match hnuhnung ber khan Huddersfield Town 2-1 in an hneh thei, inrintawkna a siam sak ngei a rinawm.

Match hnuhnung berah hliam vangin Granit Xhaka, Aaron Ramsey, Mesut Ozil leh Pierre-Emerick Aubameyang te chhawr an ni lo a, anni ho hian a ṭul a nih chuan BATE an hmachhawn thei tura ngaih a ni - an inlan a nih chuan inkhel boruak siam danglam vek thei tura ngaih an ni.

Spanish manager Emery-a'n wing back a hmang thiam ṭhin a, Sead Kolasinac leh Ains­ley Maitland-Niles ten goal venhim leh a nawr kawngah mawhphurhna sang tak an chelh leh dawn. Sokratis Papasta­thopoulos leh Rob Holding te hliam vanga an inlan theih dawn loh avangin Laurent Koscielny, Shkodran Mustafi leh Nacho Monreal te chu tlarhnung laia awm thei tur an ni dawn.

Goal veng turin Bernd Leno aiiah Petr Cech a inlan a rinawm, Czech Republic inter­na­tional hlui Cech hian sea­son tawp ruala football khelh chawlhsan a tum thu a sawi chiang tawh a, hei vang hian Europa League nomawi nen a hun tawp hman a duh ang. Ani ang bawkin Ramsey pawhin Juventus a pan hma a hun hnuhnung a nih tawh avangin hun ṭha a nei a nih phawt chuan a ṭang lehzual ngei ang.