Daniel Ricciardo-a'n beisei a nei sang

Red Bull aṭanga Renault team zawmtu Daniel Ricciardo chuan Formula 1 season thar lo awm tur chu beiseina sang tak nen a thlir mek a, Mercedes leh Ferrari te elphak thei team an neih a beisei thu a sawi chhuak.

Australian driver hian car intlansiakna sang berah hian ṭum sarih hnehna a chang tawh, hnung lam aṭanga a elpuite tlan pelh thiam tak a nihna chu a hmingṭhat pui hle.

Kum 29 mi Ricciardo chuan, "Ka duhthusam chu he team hi tun hma lama a ropuina ang tawn pui leh a ni, anni ka zawm hma khan ngun takin ngaihtuahna ka seng a, duhthlanna ka siam dik ngei pawh ka beisei," tiin a sawi.

Renault hian tun hma lamin F1-ah hian sulhnu ṭha an lo nei tawh, 1990 bawr chho khan Williams leh Benetton nen hlawhtling takin an lo thawkdun tawh. 2000 bawr chho khan Red Bull nen ropui takin an che tawh bawk a, Fernando Alonso-a'n world champion vawi hnih a nih theih nan tha thawhtu pawimawh an ni tawh bawk.