Porto ngam loh rawlthar Zaniolo

Champions League round of 16 first leg-ah AS Roma chuan 2-1 in Porto an hneh a, Italian club tana goal hnih khungtu chu khawvel hriat la hlawh lo rawlthar duhawm Nicolo Zaniolo a ni. 

Porto tan Adrian Lopez chuan goal khat a khung ve bawk a, si phurh erawh an sut zo hman lo. Mahse, second leg la khel leh tur an nih avangin Portuguese club tan goal khat hi a la 'hlu' thei. 

Porto hi match 27 (penalty tiam lohin) hnuah a vawi khat nan an tlawm ve leh ta - last 16-ah pawh hian group stage-a tlawm miah loin an lut. March 6 zanah second leg khel turin Roma hi Portugal-ah an zin ve leh dawn a, beisei a la bo lo. 

Roma khelmuala inkhelah goal a lut lawk lo a, goal hmasa ber lut tur hian minute 70 an nghah thlen a ngai. Inter Milan aṭanga Roma pantu midfielder hian Edin Dzeko siamsak chu Iker Casillas tana dan rual lohin a thlawh lut. 

Minute ruk a liam a, Zaniolo bawk kan hmu - an goal hnihna a khung a, hei pawh Dzeko thawhrah tho a ni. Manchester City striker hlui hian post a pet per a, a per lehlam chu Zaniolo hian a lo khung a ni. 

Roma hi 2-0 in an chak mai dawn niin a lang hman a, mahse an goal hnihna an chhuah aṭanga minute thumnaah  Adrian Lopez chuan khung ve lehin 2-1 in inkhel a tawp ta zawk. 

European football-ah khawvelin a hriat ngai loh Zaniolo a hmu a, Italian midfielder chanchin hian ngaihven a hlawh nghal. Nipui transfer khan Inter Milan aṭangin Roma hi pound maktaduai liin a zawm a, Inter-in pound maktaduai 33-a an lakluh Radja Nainggolan mana kal tel a ni. 

Serie A match khat pawh a khelh hmaa Roberto Mancini-a'n Italy squad-a a lo koh tawh midfielder hian tun season-ah match 22 khelin goal nga a khung tawh a, September khan Champions League-a Real Madrid an hmachhawn ṭumin Roma tana a match hmasa ber a khel. 

Kum 19 mi midfielder hi Porto laka a goal khung avang hian Mario Balotelli dawta Italian player, Champions League-a goal khung thei naupang ber a ni a, hun tawp nan minute nga chiah a awm tawh tiha lakchhuah a nihin standing ovation nen thlah a ni.