Old Trafford-ah Neymar tel lohna PSG an hrâng

Paris Saint-Germain-in Neymar leh Edison Cavani te tel loin Thawhlehni zan khan Old Trafford an luhchhuah a, Presnel Kimpembe leh Kylian Mbappe te goal hmangin 2-0 in an chak.

Paris-ah second leg khelh tur la awm mah se Phil Neville chuan a club hlui Manchester United tan Champions League-ah beisei an nei tawh lo niin a sawi.

Ole Gunnar Solskjaer hnuaiah United hi match 11-ah vawi 10 an chak a, hneh loh tawng lo mah se PSG anga thiam an tawn loh vang niin a lang. French champion hian an player neih ṭhat an chhawr thei lo chungin United chunga leng an ni tih an lantir thei a, hun tawp hma hreta English club chhuanvawr Paul Pogba hnawhchhuah a nih bawk avangin Solskjaer hote tan thawhchhuah a har tawh ang.

PSG manager Thomas Tuchel chuan Neymar, Cavani leh Marco Verratti an chhawr theih dawn loh avangin Game Plan B pawh ni loin Game Plan D an hman a 

ṭul tur thu a sawi a, amaherawhchu Italian midfielder Verratti a dam hman.

French champion hian Champions League-a Liverpool an tum ṭum aṭangin player pahnih Neymar leh Cavani an thlak a, an aia lut chu Julian Draxler leh Dani Alves te an ni a, tawnhriat nei ṭha tho an ni a. United-in PSG kim lo vanga an dinhmun ṭhat phaha an ngaihna hi khelmuala inlan te bihchian chuan chetsual theihna zawk niin a lang.

Manchester United-in kartawpa an awltir Marcus Rahsford bul an ṭantir a, Solskjaer-a hnuaia an ṭhat dan berin an inrem a, goal nawr tumin an khel. Amaherawhchu PSG-in an khingpui vuak chhiat dan tur an duang ṭha a, United chhuanvawr dang turin Marquinhos an dah.

French champion hian Pogba an ven avang te, Neymar leh Cavani awm loh vang tein goal venhim ringawt an tum tihna erawh a ni lo. Ṭan phat aṭangin United player-ten ball an inpek theih loh nan rang takin pressure an pe zat zat a, hei hi Solsjkaer-a naute tih dan nen pawh inang tho mah se dinhmun ṭha zawk tura ngaih mualneitu chu an bet hret.

Fulham laka goal ropui khungtu Anthony Martial chu PSG player zingah a tham ral a, Marcus Rashford pawhin French club tlarhnung a tibuai pha lo. Pogba thiam zia erawh ṭum khat a lang a, mawi zeta a lakluh hnuah veteran keeper Gianluigi Buffon-a'n a dan sak a, Italian keeper tla zep lo se goal theihna tur a ni.

PSG lamin Manchester United team-a invuahrem lo Angel Di Maria theihna chu thiam takin an hmang a, a tlan chakna chu mualneitu tlarhnung tan mangchhia a tling. French club-in United tlarhnung ṭum hnih chiang takin an ṭhiat a, Di Maria leh Mbappe ten goal-ah an chantir theih loh bakah an offside ve ve niin a lang bawk.

Inkhelh hmain hliam vangin PSG an buai a, inkhelh laiin Manchester United hliam vangin an buai thung. First half tawp hmain Martial chu lakchhuah a ṭul niin a lang a, Alexis Sanchez lut tura a inpeih meuh chuan Jesse Lingard zawk a thlak a ṭul. Halftime hma hretin Chilean forward-in Lingard a thlak a, second half ṭantirhah Martial aiah Juan Mata a lut ve bawk.

United hian hliam nei lo reng pawh ni se ball chelh ngam leh la muang thei an awm lo a, ball pe chhuak rang mah se PSG player-ten an chet dan an hriat lawk zel theih avangin an mualah Red Devils an che thei lo. Bench aṭanga lut Alexis pawh Jose Mourinho hun lai ang thoin vanglai hun pel tawh angin a khawsa a, Mata pawh game rangah a che thei lo.

Second half-ah United ṭantuten an auh el Di Maria chuan a thiamna hmangin a chhanglet a, a hun laia British record fee £59.7m a English club zawmtu hian Old Trafford-a a cham chhung zawngin a theihna tak tak a pholang hman lo.

Minute 53-naah Argentine winger corner pet chu Nemanja Matic lak aṭanga tal put Presnel Kimpembe-a'n chiang takin a khung. Minute sarih hnuah Mbappe-a'n Di Maria thawhrah sengin goal hnihna a khung a, darkar khat a tlin chuan team ṭha zawkin 2-0 in hma an hruai a, Di Maria thiam zia an hre bawk.

United-in thawhchhuah tum mah se keeper Buffon-a tan hna an siam thei lo a, PSG thiamzia hmuh tur a la tam zawk. Hun tawp lamah Tuchel-a'n goal venhim ngai pawimawhin tlarhnung a thuam chak a, United-in ball an chan tam phah nachungin an goal nawr a nat phah lo.

Solskjaer hoten si hnih an phurh laiin quarterfinal beisei ngam a har tawh a, minute 89-naah Paul Pogba-a'n yellow card vawi hnihna a hmuh leh bawk avangin French midfielder hi second leg-ah an chhawr thei dawn lo a, Champions League-a United zinkawng a tawp tiin a sawi theih.