Nishikori a dam chiang tawh

Hliam vanga Aus­tralian Open khel zo thei lo Kei Nishikori chu a dam chiang tawh a, Japanese player hian Pierre-Hugues Herbert chu 3-6, 6-1, 6-4 a hnehin Rotterdam Open-ah bul a ṭan fuh hle.

World number 7 Nishikori hian set hmasa ber hloh mah se a hnuhnung pahnihah a chungnung zawk a, Australian Open quaterfinal-a Novak Djokovic a hneh loh hnua a match hmasa berah hnehna nen bul a ṭan.

Kum 29 mi Nishikori chuan, "Herbert khan ball a vaw na hle a, a bik takin a service a ṭhat avangin lak a har. Dawhthei takin ka nghak a, tihsual nei tlem zawk ka nih avangin a tawpah ka vannei," tiin a sawi.

Thawhlehni zan inkhelah dangah seeded palina Milos Raonic chuan Philipp Kohl­schreiber 7-6(8), 7-5 in a hneh a, a match lehpekah chuan Grand Slam vawi thum champion tawh Stan Wawrinka nen an inhmachhawn ang.

Canadian tlangval Raonic chuan, "Stan nen hian Australian Open-ah khan inkhel hautak kan hmachhawn tawh a, tun ṭumah pawh a harsa leh khawp ang," a ti. Raonic hian set li hautak zet an khelh hnuah hnehna a lo chang tawh a ni.