Indian shuttler hmabak hautak dawn

Badminton inelna ngaihhlut tak mai All England Championship chu March 6-10 chhung hian khelh a ni leh dawn a, Indian shuttler PV Sindhu leh Saina Nehwal ten a tir aṭangin player ṭha an hmachhawn nghal dawn.

Olympic leh World Championship silver medallist Sindhu-i'n season hmasa khan semifinal a thleng a, kumina a match hmasa ber atan South Korea nula Sung Ji Hyun a hmachhawn dawn. Hyun hi nikum Hong Kong Open-a a hneh loh kha a ni, ani hi a paltlang thei a nih pawhin quarterfinal-ah seeded pathumna Chen Yufei nen an inhmachhawn leh ang.

World number 1 hlui Saina chuan a match hmasa berah Kristy Gilmour a hmachhawn dawn, a tlang chho zel a nih pawhin world number 1 Tai Tzu Ying nen quarterfinal-ah an inhmachhawn thei. Kum 28 mi Saina hian season bul a ṭan fuh, Malaysia Masters-ah final lutin Indonesia-ah nomawi a chawi; beiseina a nei sang dawn.

Hmeichhe player pahnih hmabak a hautak dawn lai hian Kidambi Srikanth leh Sameer Verma te hmachhawn tur erawh an nem deuh a, Indian tlangval pahnih B. Sai Praneeth leh H.S. Prannoy te erawh an intum nghal dawn a ni.

Arena Birmingham, Birmingham-a inelna an neih ṭhinah hian kum 18 chhung zet chu Indian shuttler ten nomawi an chawi thei ta lo a, kuminah hian mipa leh hmeichhe player zingah champion thei an awm a nih chuan chanchin lawmawm a ni ang.