Sala chungchangah Cardiff an fimkhur

French club Nantes chuan thlawhtheihna chesual vanga nunna chan ta, an player hlui Emiliano Sala man pe vat turin Cardiff City ti mah se Welsh club chairman Mehmet Dalman chuan fimkhur taka engkim an tih tur thu an sawi. 

Cardiff City leh Nantes hi Emiliano Sala manah pound maktaduai 15-in an inrem a, mahse Sala hi Cardiff khawpui a panna lamah chesualin a nunna a chan. Hetichung hian Nantes chuan Cardiff hi pound maktaduai 15 hi pe vat turin an ti a, court lama kalah hial an vau.

Mehmet Dalman chuan, "Contract-ah khan pawisa kan pek ngei ngei a ṭul thu a inziak a nih chuan dik taka thil kalpui ṭhin club kan nihna ang ngeiin pawisa chu kan pe em em ang. 

"Mahse, contract-ah khan chutiang chu a lo awm lo a nih chuan, he club chairman leh venghimtu ka nihna angin kan dikna humhim turin theihtawp ka chhuah ang. Tunah chuan kan mamawh thil leh hriat ngaite kan fawmkhawm mek a, kan chan lamte kan tihfel hunah chuan Nantes nen hian ṭha takin kan indawr leh ang tih ka chiang a ni," tiin a sawi.