Tlang sang tak lawn tur kan nei - Solsjkaer

Manchester United manager lailawk Ole Gunner Solskjaer chuan, "Kan nihna tak pholanin a awm. Tlang sang tak lawn tur kan nei a, mu mai mai hman kan ni lo. Inkhel hi a la zo lo a, hmasawn kan mamawh a ni," tiin beisei tur a la awm thu a sawi.

Norwegian manager Solsjkaer chuan, "PSG khan goal hmahruai an khung khan inkhel an thunun a, khatiang khan hun rei tak kan khel tawh lo a, inzir belh tur kan nei a, kha inkhelah khan eng pawh thleng thei a ni. Inkhel pakhat khan kan season pum a sawifiah lo a, kha ta ṭang khan kan inzir zawk ang," tiin insiamṭhat nan an hman tur thu a sawi.

Champions League second leg hi March 7-ah khelh a ni dawn a, PSG khelmual Parc des Princes-ah khelh a nih dawn avangin a awlsam dawn lo. UCL knockout chinah hian first leg-a mahni muala 2-0 a chak lo team 34 zet chu an tho chhuak thei lo a, United tan quarterfinal thleng turin history thlak danglam a ṭul ang.

PSG boss Thomas Tuchel chuan, "First half-ah ball ho te te kan hloh a, second half erawh duhthusam a ni. Chak kan phu a, kan chakna hmun hi Old Trafford a nih bawk avangin ka naute ka lawmpui hle. Chutihrualin tuna kan khelh chin hi halftime chauh a la ni," tiin inkhel a la zawh loh thu a sawi.

Paris Saint-Germain hi Europe inelnaa Manchester United an bu zawla hneh theih hmasa ber an ni a, hemi hma hian French club-in Europe inelnaah United hi Old Trafford-ah vawi 14 an tlawh a, vawi 10 an chak lo.

PSG keeper Buffon chuan, "Awlsam hmel taka kan chak theihna chhan chu team thawhhona rah a ni a, risk kan lak ngam vang te a ni bawk," tiin a sawi. Kum 41 mi Italian keeper hian Edwin van der Sar leh Iker Casillas te hnung zuiin Champions League-a clean sheet vawi 50 nei thei pathumna a ni a, Buffon-a'n UCL a khelh hmasak ber 13 August 1997-ah PSG leh United chhuanvawr Mbappe (20 December 1998) leh Rashford (31 October 1997) te an la piang lo.