Vincente Calderon-ah Atletico Madrid-in MSN an hre lo. Argentine manager Diego Simeone-a'n awmze neiin player a rem a, Atletico player-te'n champion lai Barcelona leh MSN dan tumin minute 90 an tlan hnuah UEFA Champions League semifinal an thleng.
Nilaini zan inkhel hmuhnawm takah Antoine Griezmann goal hnih hmangin Atletico Madrid-in season liam taa club ṭha ber Barcelona chu 2-0 in an hneh a, Nou Camp-a an result nen Diego Simeone hote hi 3-2 in an chak.
Luis Enrique-a'n kum zawna La Liga, Champions League leh Copa del Rey champion vek a beiseina chu a tawp a, Atletico erawhin Bayern Munich, Manchester City leh Real Madrid te hnungzuiin a sang paliah an inhlangkai. Semifinal draw hi vawiin tlai dar 4:00 hian Nyon-ah neih a ni ang.
Midfield Battle
Simeone leh Enrique te hi an inkhelh hun laia midfielder ṭha an ni a, manager an nih hnuah second leg-a an intawn hma hian vawi sarih inhmachawnin Enrique-a'n chak loh a la tem lo.
Spanish manager Enrique hian Johan Cryuff, Frank Rij-kaard leh Pep Guardiola te sulhnu a chhui avangin football mawi zawk an khel a, Argentine manager Simeone erawh football mawina letlingin khel mah se an hmuhnawmna a nep bik lo.
Barca attacking trio Messi, Neymar leh Suarez ten ball ṭha an hmuh theih loh nan Atletico boss-in midfield-ah Gabi, Koke leh Saul te pui turin Augusto Fernández a dah lut. Kum 30-a upa midfielder Augusto hian khelmualah a theihna a pho chhuak a, tlarhma leh tlarhnung a thlun zawm ṭha hle.
Catalan club hian vawi 675 an in pass a, vawi 616 an in pass dik. Barca-in an game ngai khel mah se a hmawr an bawk thei lo. Atletico lamin vawi 170-ah vawi 122 chiah an in pass dik a, mah se an tum ber Messi leh a hote an dang thei tlat.
Atletico midfielder Saul-a'n a class zia a pholang leh a, Spanish midfielder cross hi minute 36-naah Griezmann-a'n a tauh lut. Saul hian crossbar a tauh per a, French forward Griezmann-a'n Andres Iniesta handball vanga an penalty hlawhchhuah chu minute 88-naah a khung leh bawk.
Messi a nil
Lionel Messi-a'n Barca tan match hnuhnung pangaah goal a khung tawh lo a, April 2010 hnua goal a khung loh rei ber ṭum a ni. Atletico tlarhnungin Argentine forward an chelh zanah Neymar dan a harsa lo a, MSN zinga hlauawm ber Luiz Suarez lah a hnampui Diego Godin a nghawk vang chauhin a langsar.
A tawpah erawh Barcelona meuh hneh tur chuan vanneih a ngai a, midfielder hmuhnawm Iniesta ball pet chu Atletico Madrid captain Gabi-a'n a kutin box chhungah khawih mah se penalty pek an ni lo.
Enrique thiam loh
Barcelona coach Luis Enrique chuan, "Kan ṭhat dan berin kan khel chhuak lo a, coach ka nih avangin kan chak loh chhanah hian 100% in mawh ka phur a ni. Nomawi pahnih la chawi thei kan ni a, buai tur erawh kan ni lo. Hmasawn kan mamawh a ni," tiin an chak loh chhanah mawhphurna a la.
Thluak bur Simeone
Diego Simeone chuan gam plan a siam bakah inkhelh chhung zawngin mipui a chawk phur a, team chakna hnar a ni.
Argentine manager Simeone chuan, "Kan hmanraw neih ang chhun kan tat hriam a, inkhel harsa takah hnehna kan chang a ni. Kan khingpuite hian sulhnu an nei ṭha a, inkhel thlak danglam thei player an kawl
ṭeuh bawk. First leg ang thoin first half-ah inkhel kan thunun a, second half-ah erawh team ṭha zawk an ni. Kan player neih dan a inang lo a, tu zawk pawh chak thei an ni a, tun ṭum chu kan hun a ni," tiin chak zawk ni mah se a inchhuang duh lo.
