Benfica lakah Bayern tlang hram

Bayern Munich chuan a zawna a vawi nga nana Champions League semifinal lut turin Benfica lakah fiahna hautak an tawk a, second leg-ah 2-2 a inhnehtawkin inkhel pahnih belhkhawmah Portuguese club lakah 3-2 in an chak hram.

Kar hmasa khan Allianz Arena-ah Arturo Vidal goal khat hmangin Bayern hian 1-0 in hnehna an lo chang tawh. Mahse, Nilaini zan Lisbon-a inkhelah minute 27-naah forward Raul Jimenez chuan an siphruh sut nana tauh lutin inkhel hmasa nen 1-1 chiah a ni a, Benfica hian semifinal luh beiseina an nei sang hman hle.

Amaherawhchu, Jimenez goal hi Pep Guardiola nauten Vidal leh Thomas Muller goal hmangin an chhang let. Benfica attacking midfielder Talisca chuan minute 76-ah free kick aṭangin an goal hnihna a khung leh a, goal dang a lut zui tawh lo thung.

Vidal a vannei

First leg-a goal awmchhun khungtu Vidal hian hun pawimawhah a team tan player ṭha bik a nih zia lan tir leh thei a, a hun takah, a hmun takah lo awmin Benfica keeper Santana de Moraes ball rawn hnek chhuah chu box pawn aṭangin chiang takin a hlap lut a ni.

Season hmasaa Juventus final hruai thlengtu Vidal hi yellow card hmu leh se la chuan semifinal match hmasa zawk khel thei lo tura hrem theih a ni. Chile international hi midfielder Mehdi Carcela-Gonzalez laka a chet mawi loh vangin card hmu thei a ni a, referee Bjorn Kuipers-a'n a hrem lo hi a vannei hle.

Eng nge an sawi?

Benfica boss Rui Vitoria chuan, "Hamrik hnuhnung ber a rik thleng khan kan theihna zawng zawngin kan bei a, ka player-te leh min phatsan ngailo fan-te chungah ka lawm takzet. Bayern kha team ṭha leh khauh tak an ni a, an lak aṭang khan zir tur tam tak a awm. Fimkhur takin khel mah ila kan inven sen miau loh avangin a harsa a ni," tiin a sawi.

Bayern manager Pep Guar-diola chuan, "Quarterfinal khel phak chin chu team ṭha tak vek an ni tawh a, a bik takin Benfica ho rilru kha a paukhauh em avangin hmachhawn an harsa hle. Engpawh nise a zawna vawi nga Champions League semifinal thlen theih hi thil ropui tak pakhat a ni," tiin a sawi.

Hmabak

Bayern hi Bundesliga title lak tum an nih avangin an inthlahdah ngawt thiang lo a, Inrinni zan hian Schalke an lo mikhual nghal dawn. Benfica pawhin Portuguese Primeira Liga hmahruaitu an nihna humhim zel tur chuan Thawhṭanni zana Vitoria Setubal an hmachhawn hunah an chetsual a thiang bik lo ang.

Ngaihnawm

• Thomas Muller hian Cham-pions League-ah goal 36 a khung tling ta chiah a, German player zingah ani aia khung tam an awm lo.

• Arturo Vidal hian 2013 November thla hnua a vawi khat nan Champions League first leg leh second leg-ah goal a khung zawn leh ta.

• Benfica hian tun season Cham-pions League-ah goal nga an tauh lut a, anni aia tauh lut tam chu Bayern (6) chiah an ni.

• Bayern hian tun hnai khum sarih chhunga a vawi ruk nan Champions League semifinal an inhlangkai.

• Benfica-in kum 2011 Octo-ber thlaa Basel nen an in-hmachhawn hnua a vawi khat nan direct free-kick aṭangin goal an khung leh chiah.