India camp-ah Mizo

9th World Women Boxing Championship 2016 leh 2nd Rio Olympic Qualifying atan New Delhi-ah Indian boxer 48 zet an an inpuahchah mek a, Mizo hmeichhe boxer pathum bakah SYS coach Vanlalchhuanga te an tel.

May 19-27, 2016-a ṭan tur World Women Boxing Championship-ah hian category 10 a awm a, India aiawhin boxer 10 thlanchhuah a ni ang. 2016 Rio Olympic-ah hmeichhe boxing bikah category pathum a awm a; 51 kg, 60 kg leh 75 kg bik hi Olympic-a tel tur zawnna a ni dawn. Heng category pathuma medal dawng pha chin (gold, silver leh bronze) te Rio Olympic khel turin an tling ang.

51 kg-ah India boxer ṭha Mary Kom leh Pinky Rani te an awm avangin Muthi nula Rebecca Lal-inmawii tan India aiawha tel beisei ngam chi a nih loh avangin 48 kg-ah a tel ang. Rebecca hi 48 kg-ah hian Railways boxer Sarjubala Devi nen an inel dawn a, boxer pahnih hi inel tawk viau mah se Ma-nipuri boxer hi India ai-awhin a feh chhuak tam zawk.

Mamit nula Lalnunfeli chuan 54 Kg-ah India aiawh a tum dawn a, Tuithiang nula Lalbuatsaihi'n 60 kg-ah inelna a hmachhawn bawk dawn. 60 kg-ah Asian Games-a medal lak duh loh vanga lar Sarita Devi te an awm avangin Buatsaihi hmabak hi a awlsam dawn lo.

India team hi coach paliin an hruai dawn a, tun-ah hian coach pariat an awm mek. SYS coach Chhuanga chuan, "Mizo boxer-te'n hma sawn viau a, India aiawh tur chuan boxer dang an ṭhat tel avangin vanneih tel a ṭul ang," tiin Vanglaini palai a hrilh.