MSL2 Final zan khatna Tuikual South Vs Khatla TBL

Khatla TBL-in Mizoram Super League champion nawn an tum a, Tuikual South-in a vawi khat nan champion an tum. Zanin hi final game 1 a ni a, basketball ngainatute tan Hawla Indoor Stadium pan hun hi a ni.

Final ṭan hun hi zan dar 8:00 a ni a, inelna neihna hmun a len loh avangin entu tan kal hma an finthlak ang.

Khatla an lian

MSL champion lai hian India captain Vishesh Bhri-guvanshi leh Pratham Singh an kawl avangin nomawi chawi nawn turin an dinhmun a ṭha. Chutihrualin Khatla TBL hi lian viau mah se state pawn player an awm lo a, City police zawm thar R. Lalmalsawma leh Gospel Lalthawmmawia ten practice an zawm ngai loh avangin rinkai zawk ni mah se chak lo thei an ni.

MSL1 MVP H. Laldinsanga chuan, "Final boruak a awlsam ngai lo. Chutihrualin kan fitness a ṭha a, minute 40 chhung chu harsatna nei loin kan khel thei ang," tiin Tuikual South ang thoa fitness an neih ṭhat thu a sawi.

Khatla TBL hian game mumal an nei a, awmze neia an khelh ṭhin avangin team dang nen an danglam ṭhin. Final bik atan hian Thawhlehni aṭang khan an camp a, semifinal aiin an ṭha tawh zawk ang.

Mapuia chuan, "Kumtluana inkhel kan ni a, hmasawn tam a har tawh. Chutihrualin a hma ai chuan kan kang leh hret a, tuna kan mamawh chu mipui lam aṭanga ṭawiawmna ṭha a ni," mipui an pawimawh thu a sawi.

Rilru inbuatsaihna

Tuikual South coach KC Lalliantluanga chuan, "Veng-chhung leh veng pawn fan-te, TKS club board, assistant coach, manager, physio, player leh player chhungte chungah hian ka lawm a, a tawp thlengin thawhhona ṭha kan neih zel ka beisei," tiin ṭanrual a pawimawh thu a sawi.

Semifinal boruak sang taka Mission Vikings an hnehna thuruk sawi zuiin KC Maliana chuan, "Dr. Mazuala hoin psychology training kan nei ṭhin. Hei hi set play pakhat ang thoa pawimawh a ni. Kan team thawhrimna rah kan seng theihna chhan pakhat chu rilru inbuatsaihna ṭha kan nei hi a ni," tiin team dang nena an danglamna a sawi lang.

TKS coach KC Maliana hi hrem lai a nih avangin assistant coach Lalngengpuia'n team a ho ang a, semifinal game 3 khel thei lo Vanchuangpuia a inlan thei tawh bawk ang.

Tuikual South supporter-te'n fiahna dang paltlang an mamawh tawh lo a, TBL lam erawhin record nei ṭha mah se mipui lamah Tuikual South bakah Mission Veng an phak lo hle. Zanin hian Khatla veng mipuiin fiahna an hmachhawn dawn.

Head to Head

MSL1

TKS 61-68 TBL

TKS 63-59 TBL

MSL2

TKS 70-94 TBL

Road to Finals

Tuikual South

League Stage

Win 78-73 Zarkawt BCA

Win 66-62 Chaltlang Ryders

Win 81-77 MSV Vikings

Loss 59-66 Zarkawt Vikings

Loss 70-94 Khatla TBL

Semifinal (Series-ah 2-1 in chak)

Win 66-62 MSV Vikings

Loss 78-89 MSV Vikings

Win 76-69 MSV Vikings

Khatla TBL

League Stage

Win 92-83 Chaltlang Ryders

Win 84-74 Zarkawt Serpents

Loss 71-86 MSV Vikings

Win 78-56 Zarkawt BCA

Win 94-70 Tuikual South

Semifinal (Series-ah 2-0 in chak)

Win 71-66 Zarkawt Serpents

Win 60-58 Zarkawt Serpents