Bei-a goal khung zanah Bengaluru chak

Nilaini zan khan AFC Cup-ah Mizo tlangval Beikhokhei Bei-ngaichho-a'n Santosh Trophy-a Mizoram tana inlan tawh Van Lal Hruaia goal venah a pet goal a, Bengaluru FC chuan 5-3 in an mi-khual Ayeyawady United FC an hneh.

Bengaluru FC head coach Ashley Westwood-a'n Myanmar club an hmachhawnna inkhelah Indian player hlangin Bangalore club hi a khelhtir a, goalkeeper Lalthuammawia Ralte leh striker Daniel Lalhlimpuia ten inkhel bul
ṭanin second half-ah Lalchhuanmawia Fanai leh Beikhokhei-te khelmual chhungah an tlan lut bawk.

Mualneitu team tan Alwyn George (61'&88') chuan goal hnih a khung bakah CK Vineeth (20'), Seiminlen Doungel (66') leh Beikhokhei Beingaichho (80') ten goal khat ṭheuh an khung a, mikhual team tana Shillong Lajong leh Mohun Bagan striker hlui Christopher Chizoba goal hnih leh Hein Thiha Zaw-te goal khat khungin awmzia a nei thui lo.

Mizo rawlthar duhawm Daniel Lalhlimpuia'n goal khung theihna hun ṭha vawi hnih lai nei mah se a chhawr
ṭangkai thei lo a, Serchhip rawlthar goal shot hmasa zawk hi Myanmar international Hruaia'n a dan sak bakah a chance neih vawi hnihna chuan post a per bawk.

Bengaluru coach Ashley West-wood chuan, "Lalthuammawia Ralte khan vawi khat tisual lo se chuan 5-2 a chak thei tur kan ni. Mahse, hnehna kan chang a, insawisel hun a ni lo. Goal hnih ṭha tak kan khingpuite khan an khung a, mahse player naupang zawk chhawr chunga kan chak thei kha lawm tur kan ni," tiin a player-te khelh dan a fak.