Bulls record khumtu Warriors

NBA chanchina hnu-hma ropui bera ngaih chu Michael Jordan a khelhna Chicago Bulls-in kum 1995-96 regular-season khat chhunga match 72 an chak thei kha a ni a, he record hi khum theih tawh loh ang hiala ngaih a ni.

Mahse, nimin zing khan Stephen Curry hoin Golden State Warriors chuan Memphis Grizzlies lakah 125-104 in hnehna an chang a, tun season-ah match 73 an chakna chiah niin kum 20 hnuah Chicago Bulls record khumin a awm.

Oracle Arena, Oak-land-a inkhelah hian NBA Most Valuable Player Curry a langsar fal leh hle a, American point guard hian Grizzlies lakah hian 3-pointers vawi 10 neiin a vaiah point 46 zet a score leh a, hnehna an chan theih nan a thawhhlawk fal hle.

Kum 28-a upa Cur-ry hian tun season-ah 3-pointers vawi 402 neiin record thar a siam bawk a, NBA chanchinah tun hmain regular-season khat chhungin 3-pointers vawi 400 nei tling an la awm thei ngai lo a ni. Oracle Arena-a fan-te chu 'M-V-P! M-V-P!' tiin an aurual dual dual.

Warriors head coach Steve Kerr hi kum 1996-a Bulls record siamtu zinga player kha a ni a, player a nih laia an record lo siam tawh chu khum theih a nih thu leh hnuhma thar an siam thei chu a lawmthu a sawiin,"Regular season zawh dan nuam leh hlimawm ber a ni. Hlim hun a ni a, kan thil tum a san phawt chuan dinhmun sang takah kan thleng thei," tiin a sawi.

US President Barack Obama pawhin twitter-ah, "Warriors ka lawmpui a, court chhung leh pawnah pawh anni hi entawn tlak an ni. Bulls record hi khum a nih dawn chuan anni hi a phu an ni a, ka lawmpui takzet," tiin lawmpuina thu a tarlang.