Ropui takin Kobe Bryant a chawl ta
Basketball khawvela a hming dai tawh ngai lo tur Kobe Bryant-a'n ama tan chauha tiha mawi ti chungin basketball khawvel a chhuahsan a, court chhunga a inlan hnuhnung berah point 60 score chungin a chawlh thleng pawhin a thiam a la theihnghilh lo tih a lantir.
Staples Center, Los Angeles-a inkhelah Bryant hian a team LA Lakers chu 101-96 in Utah Jazz lakah hnehna a chanpui a, 1st quarter leh 2nd quarter-ah Lakers hi a hnufual zawkah ṭang mah se 3rd quarter leh 4th quarter-ah Utah Jazz hi pawt thlain hnehna an chang.
Nimin zing khan basketball history-ah bung thar ziaha awmin Golden State Warriors-in regular season-a vawi 73 chak thei hmasa ber record siam mah se history aiin Bryant-a'n ngaihven a hlawh zawk a, basketball khawvela hming dai tawh ngai lo tur inkhel hnuhnung ngaihvenin khawvelin Los Angeles khawpui lam a hawi.
NBA Hall of Famer zingah an match hnuhnung bera point 30 aia score tam an la awm ngai lo - Kobe a hun tawp thlen hma loh chu!
Tu nge Kobe?
Kobe Bryant hi NBA chanchina player langsar ber pawl a ni a, Los Angeles Lakers tana shooting guard, jersey number 8 leh 24 ha ṭhin a ni. August 23, 1978 khan Philadelphia, Pennsylvania-ah a piang a, feet 6 leh inches 6-a sang niin kg 93-a rit a ni.
Kum 1996-a NBA draft neih a nihin Charlotte Hornets chuan high school basketball guard zinga NBA draft-a thlan chhuah hmasa ber ni turin Kobe Bryant an la lut a, LA Lakers-in Kobe hi an lo hriat tawh sa a nih avangin Hornets aṭangin an la chhawng a, Kobe hian a hun tawp thlengin Lakers-ah hian a khel ta a ni.
A hming lema "Black Mamba" an tih ṭhin Kobe hian Lakers-a a khelh chhung hian NBA championship vawi nga a chawi pui tawh a, All-Star team-ah vawi 18 a tel tawh a, All-NBA Team member-ah vawi 11 telin All-Defensive team member-ah vawi 9 a tel tawh bawk.
Kum 2000-2002 chhoah khan Kobe leh Shaquille O'Neal-te inkawp chuan Lakers hi an vanglai an hman pui a, hneh theih loh tluk hiala ṭha leh khawnga ngaih an ni. Mahse an pahnih inkarah hian buaina a awm chho niin an sawi a, hei bakah hian 2004 NBA Finals-ah an chak lo bawk nen 2003-2004 season zawh khan O'Neal chu Lakers-in an trade chhuak daih.
O'Neal-a chhuah hnuah Kobe hi Lakers player pawimawh ber a ni chho a, 2005-06 leh 2006-07 season-ah khan NBA inelnaa point score hnem ber a ni a, he dinhmuna a dinna kawngah hian record eng emaw zah a siam chho. 2006 khan Toronto Raptors nen an inkhelh ṭumin a career chhunga match khata a score hnem ber ṭum thlengin point 81 a thun a, hei hi NBA chanchina match khata mimal score sang ber dawttu a ni a, score sang ber chu 1962-a Wilt Chamberlain-a'n point 100 a score kha a ni.
Ram tan
Kum 37-a upa nichunga basketball chawlhsan ta Bryant -a'n a hun hmasa lamah a nupui neih leh hliamin a tih buai ṭhin avangin ram tan a khel lawk lo a, USA tana a inlan hmasak ber chu kum 2007 khan a ni.
Ram aiawha a inlan hmasak berah FIBA Americas Championship-ah USA hi a champion pui nghal a, 2008 Beijing Olympic khel turin US a hruai kaiin final-ah Spain hnehin gold an la.
Kum 2012 London Olympic-ah pawh ram aiawhin Kobe a feh chhuak leh a, gold medal lakpui lehin ram tana inkhelh a chawlhsan zui nghal a ni.
Eng nge an sawi?
Chicago Bulls ropui vanglaia an forward Scottie Pippen chuan, "Point 60 leh chakna - a ropui thlawt e. LA khawpuia Kobe hun hnuhnung thlirtute u in sum in seng thlawn lo, Kobe kan lawm e," tiin Lakers guard Kobe a thlah.
Cleveland Cavaliers tana khel guard Kyrie Irving chuan, "A ropui thlawt a ni - midang tih theih loh leh ama kalphung bik liau liauin basketball a mangṭha ta. History-ah i chuang reng tawh ang legend!" tiin Kobe a dah sang hle.
Hmeichhe tennis world number 1 Serena Williams chuan, "Kobe Bryant ka mittui a tla hial a ni. I career ropui tak avangin ka lawmpui che a, infiammi tam tak tan entawn tur i hnutchhiah a ni," tiin basketball legend chu a thlah liam.
L.A. Lakers player hlui Earvin "Magic" Johnson Jr. chuan, "Zaninah hian kum 20 chhunga Bryan ropuina leh thiamnate chawimawi turin kan lokal a ni. Kobe Bryant hian he game hi a bum ngai lo a, fan-te hmaah dawt a sawi ngai lo. Hliam nei chungin a khel fo a, natna nei chung pawn a bei hram hram zel a - chumi hlawhtlinna pholang tur chuan championship nomawi panga kan nei a ni. Kum 20 chhunga he khawpui chungchang i ngaihtuah a nih chuan Kobe hi he khawpuiin a mihring kan neih ropui ber chu a ni," tiin a fak thiam hle.
Cleveland Cavaliers forward ropui Lebron James chuan, "He game ti ropuitu i ni a, awihawm loh khawpin i thiam a ni. Kobe bean!" tiin a ṭhianpa hi a thlah liam.
Football legend Pele chuan, "Kobe Bryant i career ropui tak avangin ka lawmpui che a, i hnathawh avangin kan lawm e," tiin a basketball player ngaihsan chu a thlah ve bawk.
Mangṭha le basketball
Kum 20 chuang baskteball khawvela hun a hman hnua chawl tur Kobe chuan, "Hei aia thawnthu ngaihnawm leh lawmawm zawk hi ziah theih a ni lo. Kum tam tak chhung min thlawpna, min nawr kalna leh fuihphurnate avang khan ka lawm em em a ni," tiin inkhelh zawhah fan-te hmaah lawmthu a sawi.
Khawvel huap mi lar Jay Z, Kanye West, David Beckham, Adam Levine leh Paula Abdul-te'n a match hnuhnung ber an enna inkhelah Kobe chuan, "Kum 20 kal chak dan em em hi ka hrethiam lo. Thil nuihzatthlak em em chu court chhunga kum 20 hun ka hman chhungin ka ṭhiante chu ball pass duh reng rengin an au a, zaninah erawh 'ball kha keng zel rawh' min ti ni berin ka hria," tiin fiamthu a thawh zui.
A match hnuhnung bera shot 50 lai neitu Kobe chuan, "He game tan hian ka theihna zawng zawng ka hlan a, chuvangin zaninah pawh hian rilru dam takin he game hi ka mangṭha theih phah a ni. Ka thinlung chu he hmunah hian ka leihbua a, ka engkim chu he hmunah hian ka dah a ni," tiin basketball a mangṭha. Kum 30 chhung NBA-ah match khata shot 50 aia nei tam an la awm ngai lo - a chawlh zanah meuh pawh Kobe-a ropuina belhchhahin a awm zel.
A chawimawina dawnte
5× NBA champion (2000–2002, 2009–2010)
2× NBA Finals MVP (2009–2010)
NBA Most Valuable Player (2008)
18× NBA All-Star (1998, 2000–2016)
4× NBA All-Star Game MVP (2002, 2007, 2009, 2011)
11× All-NBA First Team (2002–2004, 2006–2013)
2× All-NBA Second Team (2000–2001)
2× All-NBA Third Team (1999, 2005)
9× NBA All-Defensive First Team (2000, 2003–2004, 2006–2011)
3× NBA All-Defensive Second Team (2001–2002, 2012)
2× NBA scoring champion (2006–2007)
NBA Slam Dunk Contest champion (1997)
NBA All-Rookie Second Team (1997)
Los Angeles Lakers all-time leading scorer
Naismith Prep Player of the Year (1996)
Kobe-a'n basketball a thlahna poem
Duhtak Baskteball,
Ka pa mawza sei tak bun chunga
Ka ngaihtuahna rama basketball khela
Chakna basket Great Western Forum-a ka score lai khan
Thil pakhat chu a tak ngei a ni tih ka hria:
I zunah ka uai zo a ni tih hi.
Ka hmangaih em che a, ka theihna zawng zawng-
Ka ngaihtuahna leh taksa
Ka rilru leh thlarau ka hlan che a
Mipa naupang kum ruk mi
I zuna uai na tak nichung khan
Ka tan court zau tawk a awm thei lo
Keimah chauh ka inhmu a
Tumah dang ka hmu ngai lo
Tichuan ka tlan zel a
I tan tiin ball tin chan tumin
Court zawng zawng ka tlanchhuak a
Nang chuan ka theihna min ngen a
Mahse ka thinlung ka hlan zawk che a
Ka tan chuan engdang zawng ai khan i hlu miau a
Thlan tui far leh hrehawm karah pawh ka khel zel a
Chu chu chona phurawmin min koh vang a ni lo
Nangman min koh vang zawk a ni.
I tan engkim ka ti a
Ka tan engkim i tih miau avangin
I tana hlimna thleng ?hinah khan
Kha hlimna kha keipawh min pe ve a.
Mipa naupang kum ruk mi kha a suangtuahna i tihhlawhltin sak a
Kha vang khan ka hmangaih reng fo ang che
Mahse tunah zawng i kianga awm reng ka thei ta lo
Tun season chauh hi pek theih che ka nei ta
Inkhel zel turin ka thinlung a la inpeih a
Court chhunga chetla turin ka rilru hi a la inpeih reng
Mahse ka taksa zawk hian 'mang?ha' ti turin min ti si.
A pawi lo e.
Nang thlah tur che hian ka inpeih e.
Hei hi min hriatsak la ka duh
Nang nena hun tlemte kan neih hi hlim takin hmang ila
A chhia leh a ?ha
Kan lo inpek tawh zawng kha ngaihlu ila
Chu zawng chu kan neih a ni tawh miau si
Kan pahnihin hei hi kan hria e, engpawh ti ila
Kha naupang kha ka ni reng ang
Mawza sei tak bun chunga
Khelmual sir bawlhhlawh bawma
Second nga chauh awm tawh chunga
Ka kuta ball keng chunga
5 … 4 … 3 … 2 … 1 tia au ?hin kha.
Ka hmangaih reng ang che,
- Kobe Bryant