United-in vannei takin Hammers hneh

Manchester United-in Mar-cus Rashford leh Marouane Fellaini hmangin West Ham lakah goal khung hmasa mah se a tawpa chhandamtu chu David de Gea a ni. Louis van Gaal-a hoten vannei takin Wembley Stadium an thleng a, FA Cup champion turin vawi hnih chak bak an mamawh tawh lo.

Nilaini zan khan Upton Park-ah FA Cup quarterfinal replay khelh a ni a, Manchester United-in mualneitu West Ham 2-1 in an hneh. April 23 hian Everton leh United-in FA Cup semifinal hmasa zawk an khel ang a, April 24-ah Crystal Palace leh Watford ten final lut tur an zawng leh ang.

Rashford leh Martial

England captain Wayne Rooney chu chhawr theihin awm tawh mah se Louis Van Gaal-a'n Rahsford-a chungah rinna a nghat a, minute 54-naah kum 18-a upa striker hian Anthony Martial-a pass chu West Ham keeper Darren Randolph ban phak loin goal kilah a ṭhuai lut.

Rashford hian February thlaa United tana a khelh ṭan aṭangin match 11 a inlan tawh a, goal ruk a khung tawh. Hemi hun chhung hian Red Devils player dang zingah goal thum aia tam khung thei an awm lo.

First half inkhel thununtu United-in goal an khung hnuah an thunun zel a, minute 67-naah French rawlthar Martial-a cross chu Marouane Fellaini-a'n a khung.

De Gea show

Mualneitu Hammers-in minute 79-naah James Tomkins-a goal hmangin an chhang let a, hemi hnu hi chuan United keeper David de Gea a langsar lawr lak. Spanish keeper hian Michail Antonio, Andy Carroll leh Cheikhou Kou-yate te goal khung tur a dan sak a, a dan theih loh chhun chu offside vangin pawm a ni lo.

West Ham an vanduai a, Dimitri Payet chu box chhungah Daley Blind-a'n ti tlu mah se penalty pek a ni lo. Hammers hian an khelmual Boleyn Ground (Upton Park)-a an match hnuhnung ber a nih vang leh FA Cup quarterfinal replay a nih avangin hun rei zawk boruak an zo lo niin a lang a, an thiamna an phochhuah meuh chuan a tlai tawh bawk si.

Club tan

Manchester United manager Louis van Gaal chuan, "Nomawi ka duh ka ti a, amaherawhchu ka tan a ni lo. Champion hi club, player leh team tan a pawimawh a ni," tiin a sawi.

Kum 64-a upa Dutch manager hian kum khat dang contract la nei mah se season tawpah a chhuah a rinawm. FA Cup hi an champion thei a nih chuan Sir Alex Ferguson-a chhuah hnua United-in nomawi an chawi hmasak ber a ni ang.