Second round-ah Djokovic chak lo

Novak Djokovic chu Monte Carlo Masters second round aṭangin a tla! World number 1 hian Nilaini zan khan world number 55 Jiri Vesely chu darkar hnih leh minute ruk chhungin 6-4, 2-6, 6-4 in a hneh lo. Kum 22-a upa Vesely hian ATP ranking-a a sang 10 zinga mi a hneh vawi khatna a ni.

Djokovic hi tun hnai khum thum chhungin a khelh ṭhat tluan em avangin second round chinah a chak lo khat hle a, kum 2013 Madrid Masters second round-a a chak loh hnua a chak loh lehna hmasa ber a ni hial.

Grand Slam vawi 11 champion tawh Djokovic hi tun hnaiah Masters competition bikah a inlan hnuhnung vawi 22-ah hnehna a chang thei a, tournament vawi 10 a khelh zinga pakuaah a champion nghe nghe. Monte Carlo bikah hian tun hnai kum thum chhungin vawi hnih a champion bawk.

Serbian thiampuipa Djokovic chuan, "Vesely khan chak a phu, a service a ṭhain a talbuai ngai lo. A dingnghet hle a, hnehna a chan avangin ka lawmpui. A chang chuan kan duh leh beisei angin kan khel thei lo, chak lo zawka ṭan chang a awm a ngai fo," tiin a sawi.

Nadal chak chiang

'King of Clay' tia an koh ṭhin Rafael Nadal chuan a khelh thiamna hmun Clay court-ah harsatna tawk loin Braitain number 2 Aljaz Bedene 6-3, 6-3 in a hneh a, Monte Carlo third round a inhlangkai.

Grand Slam vawi 14 champion tawh Nadal tan hian Monte Carlo hi thla leha khelh tur French Open inbuatsaihna hun a ni a, Roland Garros-ah a vawi 10 nana hlawhtlinna chang turin beiseina a nei mek a ni.

Inkhel dangah French Open champion lai Stan Wawrinka pawh-in hnehna a chang a, Philipp Kohl-schreiber chu 7-6, 7-2 in a hneh a ni.