January 1, 2025 khan thla khat awh tur Road Safety Month hman ṭan a ni a; Month hawngtu Transport secretary Zosangliana chuan, Mizoramah kum 2019-2023 chhungin lirtheia chetsualna vawi 423 thlengin, mi 355 an thih phah a, lirtheia chetsualna thleng zinga 68.32% chu fimkhur loh vang a nih thu a tarlang.
Transport Secretary tarlan danin, kum 2019-2023 chhung khan Mizoramah lirtheia chetsualna vawi 423 a thleng a, mi 355 an thi. Chetsualna thleng 289 chu lirthei khalhtu fimkhur loh vang a ni a, chu'ngah chuan mi 253 an thi a ni.
Zu ruih vanga chetsualna ṭum 85 thlengin, mi 69 an thi a; tlân lohna lam tur (wrong side)-a tlân vanga chetsualna vawi 44-ah mi 28 thiin, mobile phone hmang chunga lirthei khalh vanga chetsualna vawi ngaah mi panga an thi bawk.
Transport Secretary chuan, Road Safety Month thuchah tichhuakin, lirthei khalhtute chu lirthei khalh ve dangte lakah tlawmngai zawk nih tum turin a chah a, "Mizoramah kan kawngpuite a lian lo a, lirthei a tam bawk si a, lirthei khalhtute hawihhâwm taka lirthei khalh turin kan inngen. Lirthei chetsualna tam ber chu a khalhtute fimkhur loh vang leh inthlahdah vangte a ni a, nunna tam tak kan chán ṭhin hi a pawi tak zet a ni," a ti.
Khua leh tui ṭha chuan dan a zâwm ṭhin tih sawiin Zosangliana chuan, "Dan zawm mai hi kan him tlànna a ni. Danin a phût angte ṭha takin zâwm tlâng ila, nunna hlu tak kan chhanhim thei ngei ang. Kumin Road Safety Month kan hmanah hian kumtluana nunna hlu tak kan chhanhim theih nan fimkhur taka lirthei khalh turin kan insawm a ni," a ti a, kumina Road Safety Month thupui hre reng turin lirthei khalhtute a chah.
Road Safety Month hawnna inkhawm hi Transport Directorate conference hall-ah a neih a ni a, Transport additional secretary R Lalchhanhima'n a kaihruai. Director Lalrammawia leh deputy secretary Lalthawmmawia te pawhin thu an sawi a; deputy secretary H Lalhmingliana kaihhruaiin Road Safety Month thutiam sawi rual a ni.
TRANSPORT SECRETARY TARLAN DANGTE
• Kum 2023 khan India ramah lirtheia chetsualna vangin mi 1,70,000 vel thiin, mi 4,50,000 velin an hliam.
• Sorkar laipui chhinchhiahna danin, chawhrualin India ram pumah kum tin lirtheia chetsualna vawi 4,00,000 chuang a thleng ṭhin a, mitthi 1,50,000 aia tam an awm ziah.
• India ramah chawh rualin darkar tin lirtheia chetsualna vangin mi 19 an thi ziah anga chhût a ni a; thi leh hliamte bakah, bungrua leh lirthei cheng nuai têl man a chhe ṭhin.
• Mizoramah mi nuai 13 vel bawr an awm a, January 24, 2025 thlenga lirthei ziah luh zat chu 3,99,290 vel a ni.
• Police record-a a lan danin, kum 2023 khan lirtheia chetsualna 124 a thleng a, chumi kaihhnawihah chuan mi 112 an thi. Police chhinchhiah loh pawh a awm theia ngaih a ni.
