IPR Director-in Mamit a tlawh

Information & Public Relations director C Lalnunkima chuan tun hnai khan Mamita IPR department hmunhmate a tlawh a, IPR-a thawktute leh MJA Mamit district member-te a kâwm.

C Lalnunkima chuan, MJA leh IPR department chu thawhhona ṭha tak hnuaia hma laho zel turin a sáwm a, "Khawvel hmasawnnain a ken tel social media-in nasa takin min luhchilh tawh a, chanchinbu-te'n ngaihhlut a hlawh tâwk tawh lo deuhin lang mah se, print media hi document pawimawh, ziaka awm ngei a nih avangin chawi nun thar leh a ṭul," a ti a; thu dik leh rintlak puan chhuah kawnga chanchinbu pawimawhna ṭhangthar zawkte zirtirtu nih tum turin a chah.

MJA, Mamit district member-te chuan an harsatna leh mamawhte IPR Director hnenah an thlen a, Director hian MJA building sak mek a tlawh bawk.

IPR Director hian Mamit District Information & Public Relations office-a thawktute chu ṭhahnemngai taka thawk turin a chah a, "Sorkar leh mipui inkara palai hna thawktu kan nih angin kan hna kan hriat chian a pawimawh. Thawktu indaih lohnaah sorkarin theihtawp a chhuah mek a, indaih lohna hi harsatna atana hmang loin, a awm ang angte'n ṭhahnemngai leh ṭangkai taka hna kan thawh a ṭul," a ti.