K Sapdanga'n hnathawh a enfiah

Aizawl North-III bialtu MLA K Sapdanga, minister chuan February 1, Inrinni khan a bial chhung, Chanmari West-a hmasawnna hna thawk mek leh hmachhawpte a enfiah a, bialtu corporator H Lalremtluanga'n a ṭawiawm.

K Sapdanga hian Chanmari West leh Chanmari inrina Ramlai Road lirthei tlan theiha siam chhunzawm dan tur te, high school chung phui thei lo thawm ṭhat mek leh chhunzawm dan tur te, YMA Zawlbuk sak mek chhunzawm dan tur te, community hall zauhna tur ruahman theih a nih leh nih loh te, Lunghlu Road-a hna thawh mekte a enfiah a ni.

Sorkar hmasain hma an lo lak tawh chu a theih ang anga ṭha taka chhunzawm tura ruahmanna siam zel a nih thu sawiin K Sapdanga chuan, "Nikum lama Chanmari West-in harsatna kan tawh Chanmari leh Zarkawt tlang lam tui paihna mumal lo pawh a rang lama siam tura ruahmanna siam mek a ni a, Aizawl veng hrang hrang kawrpui siamṭhatna tur project pawh hna thawh ṭan thuai tum a ni," a ti.

K Sapdanga chuan, hna hmasa atan kawrpui 20 vel department lamin siam turin ruahmanna a siam tih sawiin, "Hemi atan hian cheng vbc. 60 chuang tihfel a ni tawh a, a rang thei ang bera hna thawh ṭan theih kan beisei," a ti a; Lunghlu Road pawh vawi khatah hna thawh nghal vek theih loh mah se, a hmatiamin thawh phei zel theih an in beisei thu a sawi.