Lunglei SP hoin hmalakna thlir let

Lunglei SP J Lalmuankima hoin tun hnai khan a pisaah Lunglei khawpuia hnu chhuitu, investigating officer-te'n kum 2024-a an hmalakna leh kumina an hmalak tawhnate an thlir let.

J Lalmuankima chuan, mipui tana thawk an nih angin mipui tana dawr nuam leh biak nuam nih tum turin police-te a fuih a, " VDP leh tlawmngaipawlte nena police-te thawhhona a ṭhat vangin kum hmasa aiin nikumah thubuai ziahluh a tlem a, a lawmawm hle," a ti.

Mahni in leh a vela CCTV vuahte'n hnu chhuina kawngah police-te nasa taka a puih thu sawiin Lunglei SP chuan mahni in leh a vela CCTV vuah chu intihhmuh zel turin mipuite a ngen.

Lunglei SP chuan kum 2023 aia kum 2024 chhungin lirthei chetsualna kaihhnawihah thihna a thlen tam chungchangah, "Hawngpui te a ṭhat tawlh tawlh rualin mipuite leh lirthei khalhtute fimkhur deuh deuh a ngai," a ti a, zirna-in leh kohhran bakah, mipuiteah a tam thei ang ber inzirtirna buatsaih tum a nih thu a sawi.

Mobile phone bo chungchangah pawh uluk taka chhui zui zel a nih tur thu sawiin J Lalmuankima chuan, "A lo leitute thleng pawha thu buai siamsak zel a ni dawn," a ti.

Lunglei Police-te tarlan danin, mobile phone second hand kan lei dawn reng rengin black list nge white list a ni tih finfiah hmasak phawt hi a him ber a; Google search hmangin CEIR portal emaw Cyber Crime portal emaw aṭangin awlsam tein tute pawhin finfiah theih reng a ni.