Tuivai lei dawh zo tawh, enchhin a ni

Hmar lam tlangdung kaltlanga Mizoram leh Mamipur inkalpawhna Tuivai lei chu dawh zawh a ni a, February 1, Inrinni khan enchhin a ni.

Tuivai lei dawh hi February 1 khan lirthei tlânna atan a ṭha tawk em tih enchhin tur a nih avangin Mizoram PWD hotute chuan YMA, Tuisual Group hruaitute chu a hmuna enpui turin an sáwm a; president Lalremsanga Biate hoin lei enfiahnaah an tel.

Lei a rinawm tâwk em tih enchhin a ni a, enchhinnaah hian truck lian (Hyva) hman a ni. Hyva truck chu a ruaka tlantir phawt a ni a, a laiah dintirin, leiin a zo ṭha em tih enchhin a ni. Hyva truck chu a phurh theih tâwk chanvea rit phurhtira tlantir leh a ni a; chumi hnuah a phurh zawh tâwka ngaih ṭiau phurin lei zawhtir leh a ni bawk. Enchhinna hi hlawhtling taka neih a ni.

Tuivai lei hi March 13, 2024-ah dawh ṭan a ni a, ft. 200-a sei a ni. Ton 20 aia rit lirthei tan zawh phal a ni lo a, zawh phal chin bituk chu zâwm vek turin PWD chuan mipui an ngen.

Tuivai lei hi dawh zawh ni tawh mah se, mipui hman theiha hawn a la ni lo. Hawn a la nih loh chhan hi Mizoram leh Manipur lam, lei bulṭhut kawng siam ṭhat a la ni loh vang a ni. Lei bulṭhut kawng hi Manipur lam chu siam mek a ni a, Mizoram lam chu kar leh lamah siam ṭan tum a ni.