Sorkar lirthei kawl thei chin zir chiang tur committee din

Mizoram sorkar chuan sorkar hnathawk zinga sorkar lirthei kawl thei chin tur zir chiangtu tur committee tun hnai khan a din.

GAD chuan tun hnai khan notification tichhuakin, sorkar lirthei kawl thei chin zir chiangtu tur Committee on Entitlement of Vehicles din thar a nih thu a tarlang. Committee hian sorkar lirthei kawl thei chin tura department, commission, agency leh board aṭanga rawtna lutte zir chiangin thutlukna an siam dawn a ni.

Committee-ah hian GAD Secretary chu chairman a ni a, GAD(G) Under Secretary chu member secretary a ni. Member turte chu GAD Additional Secretary, Joint Secretary, GAD(G) Deputy Secretary leh Under Secretary leh, Finance department aiawhte an ni.