Road Safety Month chhungin fimkhurna turte a tam thei ang ber inzirtir tum a ni

Mizoram Road Safety Council ruahman angin February 2025 chhungin Mizoram pumah Road Safety Month hman a ni dawn a; lirthei khalhtute leh lirthei endik bakah, lirthei kaihhnawih dan hrang hrang leh fimkhurna turte a tam thei ang ber inzirtir tum a ni.

Kumina Road Safety Month thupui chu 'Fimkhur leh him takin lirthei khalh ṭhin ang che' tih a ni a; Month hman chhungin kawng hrang hrangin hmalak a ni dawn a, lirthei chetsualna a tlem theih nan nasa lehzualin inzirtirna (awareness programme) buatsaih a ni dawn.

Road Safety Month chhungin fimkhur taka lirthei khalh tura thutiamna (pledge) neih te, lirthei leh kawngpuia himna chungchanga inzirtirna mipui vantlang hriat tura puan chhuah te, kawng ṭha lo (pot holes & black spot identify) vanga lirthei chetsualna lai enfiah te, lirthei khalhtute leh lirthei dinhmunte a tam thei ang ber endikte kalpui tum a ni.